Պակիստանում ոստիկանական համալիրի վրա հարձակումից հետո սպանվել է 8 զինյալ
Պակիստանի հյուսիսարևմտյան Քոհաթ քաղաքում ոստիկանական համալիրի վրա հարձակումից հետո իրականացված շուրջ 20 ժամ տևած գործողությունն ավարտվել է։ Պակիստանի Խայբեր Փախտունխվա նահանգի ոստիկանությունը X-ի իր պաշտոնական էջում հայտնել է, որ հարձակման և դրան հաջորդած բախումների հետևանքով զոհվել է 23 մարդ, ավելի քան 100-ը վիրավորվել է։
Նշվում է, որ ոստիկանության և անվտանգության ուժերի գործողությունների ընթացքում սպանվել է 8 հարձակվող, իսկ ոստիկանության համալիրի կարևոր շենքերը մաքրվել են զինյալներից։
Հարձակումը տեղի էր ունեցել սեպտեմբերի 18-ին․ պայթուցիկով բեռնված մեքենան պայթեցվել էր Քոհաթի ոստիկանության համալիրում գտնվող մզկիթի մոտ, ինչից հետո զինված անձինք ներխուժել էին համալիր և հարձակվել ոստիկանության ստորաբաժանումների վրա։
Գործողությանը մասնակցել են ոստիկանության, հակաահաբեկչական վարչության և անվտանգության ուժերի ստորաբաժանումները։ Ոստիկանության տվյալներով՝ հարձակվողները ներթափանցել էին նաև հատուկ նշանակության ստորաբաժանման շենք, որտեղ նրանց դեմ գործողությունը շարունակվել էր մինչև համալիրի ամբողջական մաքրումը։
