Հայաստանի օրենսդրության սահմանափակում TRIPP ուղու վրա չի լինելու. Նիկոլ Փաշինյան
Հայաստանն ու ԱՄՆ համատեղ իրավաբանական անձ ստեղծելու գործընթաց են սկսել։ Այսօր տարածաշրջանային համագործակցության թեմայով համաժողովի ժամանակ այս մասին հայտարարեց Նիկոլ Փաշինյանը`անդրադառնալով «Թրամփի ուղի» նախագծին։
«Կլինի TRIPP ընկերություն կամ գործընկերություն. անվան վերջնականացումն ընթացքի մեջ է։ Կլինի տնօրենների խորհուրդը, որը կղեկավարի ընկերությունը, տնօրենների խորհրդում ներկայացված կլինեն ՀՀ–ն և Միացյալ Նահանգները, տնօրենների խորհրդում ներկայացվածությունը կախված կլինի մասնաբաժնից։ Սակայն կարևոր է արձանագրել, որ ռազմավարական նշանակության հարցերի վերաբերյալ Հայաստանը կունենա վճռական ձայնի իրավունք»,- ասաց նա։
Փաշինյանի խոսքով՝ «Թրափի ուղի» ծրագիրը մի քանի փուլ է ունենալու՝ երկաթուղիներ, խողովակաշարեր, որի մեջ կարող են լինել նավթամուղներ և գազամուղներ։
Ըստ նրա՝ Հայաստանն ԱՄՆ-ի հետ «Թրամփի ուղու» վերաբերյալ քննարկում է հողի կառուցապատման իրավունքի երկու սցենար՝ 49 կամ 99 տարով։
«Պայմանները կապված են ներդրման և եկամտաբերության հետ։ Ներդրողը պետք է ունենա իր ներդրումներից եկամտաբերություն ստանալու երաշխիքներ։ Եթե մենք ասենք 5 տարով ենք տալու այդ հողը , ապա ոչ մեկ ներդրում չի անի, որովհետև անիրատեսական է 5 տարում այդքան ներդրած գումարը հետ ստանալ»,- նշեց Փաշինյանը։
Նա ընդգծեց, որ այս քննարկումներում քաղաքական բաղադրիչ չի տեսնում. դրանք բնույթով զուտ ֆինանսական և տնտեսական են։
