ՀԱԿ պատգամավորները ԱԺ հատուկ նիստին չեն մասնակցի
Ազգային ժողովի «Հայ ազգային կոնգրես» խմբակցությունը քիչ առաջ ավարտված նիստում որոշել է չմասնակցել Հայաստանի Հանրապետության Նախագահի պաշտոնի ստանձնման Ազգային ժողովի ապրիլի 9-ի հատուկ նիստին: Այս մասին «Pastinfo.am»-ի թղթակցին հայտնել է խմբակցության քարտուղար Արամ Մանուկյանը:
Ըստ Ա.Մանուկյանի՝ ՀԱԿ-ն ավելի վաղ հայտարարել էր, որ ՀՀ նախագահի փետրվարի 18-ի ընտրությունները կեղծված են և ՀԱԿ-ը չի ճանաչում այդ ընտրությունների արդյունքները: Նա ընդգծել է, որ սրանով պայմանավորված՝ նախկինում էլ կար երդմնակալությանը չմասնակցելու որոշում, սակայն ֆորմալ առումով այն այսօր կայացվեց:
Ինչ վերաբերում է ԱԺ էթիկայի հանձնաժողովի աշխատանքներին խմբակցության ներկայացուցչի հնարավոր չմասնակցությանը, ապա, ըստ ՀԱԿ խմբակցության քարտուղարի, այդ մասին որոշում չկա, սակայն խմբակցությունը հակված է այդպես վարվել:
«Դա միակ հանձնաժողովն էր, որ պարիտետ կար, հարցեր քննարկելու հնարավորություն կար: Հիմա իշխանություններն այդ էլ ամբողջությամբ վերցրեցին իրենց ձեռքը, և այնտեղ ընդդիմադիր ներկայացուցչի մասնակցությունն ուղղակի անիմաստ է դառնում. որևէ հարց չես կարող անցկացնել»,-նշել է Ա.Մանուկյանը:
