Ուկրաինան Հայաստանին եվրոպական ինտեգրման սեփական փորձն է առաջարկել
Օգոստոսի 14-ին Ուկրաինայի փոխարտգործնախարար Ալեքսանդր Միշչենկոն հանդիպում է անցկացրել հայկական պատվիրակության հետ՝ Հայաստանի փոխարտգործնախարար Վահան Կոստանյանի գլխավորությամբ, որը ժամանել էր Ուկրաինա՝ մասնակցելու Կիև-Պեչորյան լավրայի 975-ամյակին նվիրված տոնակատարություններին։ Դրա մասին նշվում է Ուկրաինայի ԱԳՆ հաղորդագրության մեջ։
«Զրուցակիցները քննարկել են ուկրաինա-հայկական հարաբերությունների արդիական հարցերը, մասնավորապես՝ քաղաքական երկխոսության ակտիվացման ուղիները, և կարծիքներ են փոխանակել երկկողմ համագործակցության առաջնահերթ ուղղությունների վերաբերյալ՝ փոխադարձ հետաքրքրություն ներկայացնող բոլոր ոլորտներում։
Այդ համատեքստում ընդգծվել է համապատասխան շփումների ընդլայնման կարևորությունը և սահմանվել են քաղաքական մակարդակով երկկողմ միջոցառումների անցկացման, ինչպես նաև ճյուղային համագործակցության պայմանները։
Ուկրաինայի դեմ Ռուսաստանի զինված ագրեսիայի ֆոնին առանձնահատուկ ուշադրություն է հատկացվել տարածաշրջանային անվտանգությանը և դրա կայունացման ուղիներին։
Հայաստանում խորհրդարանական ընտրությունների հաջող անցկացման և երկրի նոր կառավարության ձևավորման համատեքստում Ալեքսանդր Միշչենկոն հույս է հայտնել, որ Երևանը կշարունակի իր եվրոպամետ ուղեգիծը։
Միշչենկոն հայկական պատվիրակությանը տեղեկացրել է Ուկրաինայի եվրոպական ինտեգրման ներկա վիճակի և հեռանկարների մասին, ինչպես նաև ընդգծել է Երևանի պատրաստակամությունը՝ այդ ոլորտում Հայաստանի հետ փորձի փոխանակման համար։
Հանդիպման ընթացքում կողմերը քննարկել են նաև միջազգային կազմակերպությունների շրջանակում հետագա փոխգործակցության հարցերը և սահմանել համագործակցության առաջնահերթ ուղղությունները միջազգային հարթակում»,- նշել են Ուկրաինայի ԱԳՆ-ում։
