Սերժ Սարգսյանն ու Բարսեղ Բեգլարյանը կարող են ներկա չգտնվել իրենց գործով դատական նիստերին. Դատարանը բավարարեց միջնորդությունը
Այսօր Հակակոռուպցիոն դատարանում՝ դատավոր Սարգիս Դադոյանի ղեկավարությամբ, ընթանում է միավորված քրեական վարույթներով հերթական դատական նիստը:
Հիշեցնենք, որ այս գործով դատավոր Գիվի Հովհաննիսյանի լիազորությունները դադարեցվել են, և հիմա դատաքննությունը կշարունակի Սարգիս Դադոյանը:
Քննվում է, այսպես կոչված, «Դիզելի»՝ հարություն առած շինծու գործը, որով նախագահ Սերժ Սարգսյանն արդեն մեկ անգամ արդարացվել է:
Հիշեցնենք, որ ավելի վաղ այս գործով Սերժ Սարգսյանին արդարացրած դատավոր Վահե Միսակյանի լիազորություններն արդեն իսկ այլ պատրվակով դադարեցվել են:
Նախորդ դատական նիստի սկզբում պաշտպան Ամրամ Մակինյանը դատարանին կրկին հիշեցրեց՝ նյութերի նախապատրաստման ընթացքում խախտվել են գործի հարուցման ժամկետները, և սա արձանագրել է Վերաքննիչ դատարանը:
Հաջորդիվ դատարանն անցավ ապացույցների հետազոտման փուլին, դրանց քննության հերթականությանն ու կարգին:
Հանրային մեղադրողները ներկայացրեցին ապացույցների հետազոտման իրենց հերթականությունը:
Այսօրվա դատական նիստում ՀՀ 3-րդ նախագահ Սերժ Սարգսյանի պաշտպան Ամրամ Մակինյանը միջնորդեց դատական նիստերն անցկացնել Սերժ Սարգսյանի բացակայությամբ, պաշտպանների ներկայությամբ:
«Միևնույն ժամանակ պարտավորվում ենք անհրաժեշտության դեպքում պարտաճանաչ կերպով ապահովել Սերժ Սարգսյանի ներկայությունը դատական նիստերին»,- ասաց Ամրամ Մակինյանը:
Նմանատիպ միջնորդությամբ հանդես եկավ նաև Բարսեղ Բեգլարյանը:
Դատարանը բավարարեց միջնորդությունը և թույլատրեց գործի քննության, այսինքն՝ ապացույցների հետազոտման փուլում չներկայանալ դատական նիստերին: Դատական նիստն ընդհատվեց: Հաջորդ նիստը տեղի կունենա սեպտեմբերի 10-ին՝ ժամը 15:30-ին:
Մանրամասները՝ տեսանյութում:
