Իրանի ոչնչացրած ռադարների փոխարինումը ԱՄՆ-ին ավելի քան 1 մլրդ դոլար կարժենա. Foreign Policy
Մերձավոր Արեւելքում վնասված կամ ոչնչացված ամերիկյան ռադարային համակարգերի փոխարինումը կարող է Վաշինգտոնի վրա ավելի քան մեկ միլիարդ դոլար նստել եւ տեւել մի քանի տարի։ Այս մասին գրել է ամերիկյան «Foreign Policy» պարբերականը՝ վերլուծելով ԱՄՆ հակահրթիռային պաշտպանության համակարգի հիմնական բաղադրիչների արժեքը եւ արտադրության ժամկետները։
Պարբերականի գնահատմամբ՝ բալիստիկ հրթիռների վաղ հայտնաբերման համար նախատեսված AN/FPS-132 ռազմավարական ռադարներն ամենաթանկ եւ բարդ համակարգերից են։ Դրանց արտադրությունը, մատակարարումը եւ տեղակայումը կարող են տեւել հինգից ութ տարի, յուրաքանչյուր նման ռադարի արժեքը գնահատվում է մոտավորապես 1,1 միլիարդ դոլար։
Ավելի մոբիլ AN/TPS-59 ռադիոլոկացիոն համալիրները, որոնք օգտագործվում են մարտական գործողությունների թատերաբեմերում օդային եւ հրթիռային թիրախները հայտնաբերելու համար, կարող են փոխարինվել շատ ավելի արագ: Դրանց արտադրության եւ տեղակայման ժամկետը տեւում է մինչեւ երկու տարի, իսկ արժեքը գնահատվում է մոտավորապես 50-75 միլիոն դոլար մեկ միավորի համար։
Վերլուծաբանները նշել են, որ գլխավոր խնդիրը ոչ միայն նման համակարգերի բարձր գինն է, այլեւ դրանց երկար արտադրական ցիկլերը: Ժամանակակից ռադարների ստեղծումը պահանջում է բարդ էլեկտրոնիկա, հատուկ բաղադրիչներ եւ հազվագյուտ նյութեր, ուստի նույնիսկ անհապաղ ֆինանսավորման դեպքում դրանց նորոգումը տեւում է տարիներ:
Այս ֆոնին նման համակարգերի հնարավոր կորուստները կարող են զգալիորեն ազդել տարածաշրջանում ԱՄՆ հրթիռային պաշտպանության կարողությունների վրա եւ պահանջել զգալի լրացուցիչ ծախսեր վաղ նախազգուշացման ենթակառուցվածքների վերականգնման համար։
