ԵՄ-ն դեռևս միասնական չէ ռուսական սառեցված ակտիվները Կիևին փոխանցելու հարցում
Եվրամիության արտաքին գործերի նախարար Կայա Կալասը հայտարարել է, որ ԵՄ անդամ ոչ բոլոր պետություններն են աջակցում, որ Արևմուտքում սառեցված ռուսական արժութային պահուստներն ուղղվեն Ուկրաինայի համար փոխհատուցման վարկը ֆինանսավորելու ծրագրին. հաղորդում է BBC-ն: Բայց, ըստ նրա, ԵՄ-ն փորձում է հնարավորինս շուտ համաձայնության հասնել։
Կալասը կողմ է սառեցված ռուսական ակտիվների օգտագործմանը փոխհատուցումներ վճարելու համար, որոնք Ռուսաստանը, պատերազմի ավարտից հետո, ի վերջո վճարելու է Ուկրաինային։
«Եթե մենք հաշվի չառնենք այս [ռուսական] ակտիվները, ապա, իհարկե, բեռը կընկնի մեր հարկատուների վրա»,- հայտարարել է Կալասը։
Անցյալ շաբաթ Գերմանիայի կանցլեր Ֆրիդրիխ Մերցը կոչ արեց՝ Ուկրաինային տրամադրելու 140 միլիարդ եվրո անտոկոս վարկ մի քանի տրանշերով՝ օգտագործելով Եվրոպական կենտրոնական բանկի ավանդային հաշվում պահվող սառեցված ռուսական միջոցները։
