Հիմա եթե Սահմանադրությունից Եկեղեցու բացառիկության մասին դրույթը հանի, ու ես կոչ անեմ ժողովրդին դեմ գնալ դրան, ես կհամարվեմ քաղաքականությանը խառնվո՞ղ. Հայր Ռուբեն
«Պրեսսինգ» հաղորդաշարում հյուրը Մայր Աթոռ Սուրբ Էջմիածնի Եկեղեցական հայեցակարգային բաժնի տնօրեն Հոգեշնորհ Տ. Ռուբեն վարդապետ Զարգարյանն է։
«Այն, որ այս ճակատային հարձակումը տեղի ունեցավ Շվեյցարիայում Վեհափառի մասնակցությամբ ժողովից հետո, ուր շոշափվեցին արցախահայության իրավունքները, ինչ-որ արտաքին կապի մասին խոսում է»,- խոսելով Եկեղեցու վրա իշխանությունների հարձակման արտաքին հետքի մասին՝ ասաց Հայր Ռուբենը:
Նա հիշեցրեց՝ Սահմանադրությամբ ինչ իրավունքներ ու սահմանափակումներ են վերապահված Հայ Առաքելական Սուրբ եկեղեցուն:
«Սահմանադրության մեջ շատ հստակ ձևակերպում կա, որ Հայաստանի Հանրապետությունը ճանաչում է Հայ Առաքելական եկեղեցու բացառիկ դերը։ Սրանից բխում են օրենքներ, որ պետությունը չի միջամտում եկեղեցու հարցերին, արգելվում է եկեղեցու մասնակցությունը պետական կառավարմանը։ Այո՛, եկեղեցին չի կարող խառնվել դատական, օրենսդիր ու գործադիր իշխանության գործերին։ Դուք նման բան Հայաստանում տեսե՞լ եք, որ Եկեղեցին խառնվի։ Անգամ Բագրատ սրբազանի նախաձեռնած պայքարի ժամանակ նրա եկեղեցական սպասավորությունը կախակայվեց։ Եկեղեցականն իրավունք ունի և պե՛տք է իր կարծիքը հայտնի ազգային հարցերի վերաբերյալ, հասարակության, պետության համար կարևորագույն հարցերի վերաբերյալ: Այսինք՝ ես՝ որպես հոգևորական, 2-րդ սորտի մա՞րդ եմ, չե՞մ կարող խոսել երկրի քաղաքական կյանքում տեղի ունեցածի մասին։ Բայց չէ՞ որ այդ իրավունքն ինձ օրենքո՛վ է վերապահված»,- ասաց Ռուբեն վարդապետ Զարգարյանը:
Նրա խոսքով՝ եթե մի երկրում արդարություն չկա, այնտեղ կյանքը չի կարող լիարժեք շարունակություն ունենալ։
«Վերջին տարիներին մեկ միլիոնից ավելի աբորտ է արվել։ Եկեղեցին չխոսի՞ սրա մասին, ասի՝ քաղաքակա՞ն է։ Եկեղեցին չխոսի՞ արտագաղթի մասին։ Եթե մեկը եկել է իշխանության, ում ապիկարության պատճառով մենք մեր Հայրենիքից անընդհատ կտորներ ենք զիջում, ու չգիտենք՝ վերջը որն է, եկեղեցին չխոսի՞»,- տարակուսեց հոգևորականը։
«2018թ․ հեղափոխության սկիզբն էր թավշյա, հետևանքն արյունն էր՝ Արցախյան պատերազմը։ Այս հեղափոխությունն անարյուն չէր։ Մեր երկրի տարածքն օր օրի փոքրացնում է այդ մարդը: Այս տարածքը, որի քարտեզն առած թափահարում է, չի ապահովում մեր կյանքը։
Սահմանադրության փոփոխություն է նախատեսում (Ադրբեջանի և Թուրքիայի պահանջով)․ դա քաղաքական գործընթա՞ց է, թե՞ ոչ։ Հիմա եթե Սահմանադրությունից Եկեղեցու բացառիկության մասին դրույթը հանի, ու ես կոչ անեմ ժողովրդին դեմ գնալ դրան, ես կհամարվեմ քաղաքականությանը խառնվո՞ղ։ Իմ կյանքը, իմ եկեղեցու կյանքը, իմ տաճարների պատկանելության կյանքն այդ մարդիկ են որոշում, ու ինձ ասում են՝ լռի՛ր։ Ես պիտի լռե՞մ: Իրենք շատ լավ գիտեն՝ ինչ են անում»,- ասաց Հայր Ռուբենը։
Մանրամասները՝ տեսանյութում:
