«Ես ձերբակալված չեմ, համապատասխան մարմինների հետ դեռևս չեն խոսել». Սոթքի ղեկավարը՝ իր ձերբակալության լուրի մասին
Քիչ առաջ ABC media-ն գրել էր, որ ձերբակալվել են «Միասնական Վարդենիս» խմբակցության անդամ Դավիթ Շահնազարյանն ու Սոթքի ղեկավար Սևակ Խաչատրյանը: Լրատվամիջոցին տեղեկությունը փոխանցել էր «Միասնական Վարդենիս» դաշինքի գործավարը։
Սակայն Սոթքի ղեկավար Սևակ Խաչատրյանը 168.am-ի հետ զրույցում ասաց, որ այդ տեղեկությունն իրականությանը չի համապատասխանում։
«Ինքս որևէ բանից տեղյակ չեմ, ինչպես տեսնում եք, հիմա ես ձեզ հետ խոսում եմ, հետևաբար՝ ձերբակալված չեմ։ Համապատասխան մարմինների հետ էլ ինքս դեռևս չեմ զրուցել»,- նշեց Սևակ Խաչատրյանը։
Հարցին՝ Սոթքի համայնքապետարանում իրավապահները որևէ գործողություն իրականացրե՞լ են, Սևակ Խաչատրյանը պատասխանեց, որ իր ներկայությամբ որևէ գործողություն համայնքապետարանում չի եղել։
«Իսկապես ես որևէ բանից տեղյակ չեմ»,- շեշտեց մեր զրուցակիցը։
168.am-ը փորձեց կապ հաստատել նաև Դավիթ Շահնազարյանի հետ, սակայն վերջինս հեռախոսազանգերին չպատասխանեց։
