Ադրբեջանը կարող է տարեկան մինչև 300 միլիոն դոլար վաստակել «Հյուսիս-Հարավ» միջանցքով բեռնափոխադրումներից
Ադրբեջանը կարող է տարեկան 250-300 միլիոն դոլար ստանալ Հնդկաստանից և Հարավարևելյան Ասիայի երկրներից՝ իր տարածքով «Հյուսիս-Հարավ» միջազգային տրանսպորտային միջանցքով (ՄՏՄ) ապրանքների տարանցման շնորհիվ։
Ինչպես հաղորդում է ադրբեջանական Report-ը, այս մասին Բաքվում կայացած «Եվրասիայի տրանսպորտային շրջանակի ձևավորումը և Ադրբեջանի նշանակալի դերը այս գործընթացում» միջազգային կլոր սեղանի ժամանակ հայտարարել է Ռումինիայում Իրանի նախկին դեսպան, Ադրբեջանում Իրանի դեսպանատան փորձագետ Համիդռեզա Արշադին։
Նրա խոսքով՝ Իրանի և Ադրբեջանի միջև տրանսպորտային համագործակցությունը երկկողմ հարաբերությունների հիմնական ոլորտներից մեկն է, և այս համատեքստում Հյուսիս-Հարավ միջանցքի զարգացումը հատուկ նշանակություն ունի։
«Այս երթուղով բեռնափոխադրումների ծավալը 2023 թվականին աճել է 50%-ով: Ագբենդի երկաթուղային կամրջի կառուցումը նույնպես կարևոր դեր է խաղացել մեր երկրների լոգիստիկ հնարավորությունների ընդլայնման գործում»,- նշել է Հ. Արշադին:
Նա ընդգծել է, որ «Հյուսիս-Հարավ» միջանցքը ծառայում է որպես Եվրոպայի և Ասիայի միջև ամենակարճ և ամենաարդյունավետ տարանցիկ ուղի։ Դրա զարգացումը ոչ միայն ամրապնդում է տարածաշրջանային կապը, այլև նպաստում է տնտեսական դիվերսիֆիկացիային և միջազգային առևտրի աճին։
«Հնդկաստանից և Հարավարևելյան Ասիայից ապրանքները կմատակարարվեն Իրանի Բանդար Աբբաս նավահանգստով և Ադրբեջանի տարածքով։ Այս երթուղով փոխադրման պոտենցիալ ծավալը տարեկան մինչև 15 միլիոն տոննա բեռ է։ Սա Ադրբեջանի համար ստեղծում է զգալի տարանցիկ ներուժ՝ տարեկան մոտ 250-300 միլիոն ԱՄՆ դոլար»,- ասել է փորձագետը։
Նա հավելել է, որ այս երթուղով բեռների մատակարարումը 10-15%-ով ավելի էժան կլինի, քան այլընտրանքային երթուղիներով.
«Անցնող հեռավորությունը կկրճատվի 800 կմ-ով՝ համեմատած Սուեզի ջրանցքով անցնող երթուղու հետ, իսկ մատակարարման ժամկետները՝ 20 օրով: Բացի այդ, երթուղին ապահովում է բեռների առաքման ավելի բարձր հուսալիություն նշանակման վայր»:
Նախնական հաշվարկներով, նրա խոսքով, խնայողությունը կարող է կազմել ավելի քան 2500 դոլար՝ տեղափոխվող յուրաքանչյուր 15 տոննա բեռի համար։
«Այս համատեքստում, «Հյուսիս-Հարավ» միջանցքի արևմտյան երթուղին՝ Ռուսաստանի Աստրախանով և Մախաչկալայով, այնուհետև Ադրբեջանի տարածքով՝ Սամուրից մինչև Աստարա, ապա իրանական Աստարա-Ռեշտ-Ղազվին երկաթուղով, որի շինարարությունը շարունակվում է, ռազմավարական նշանակություն ունի տարածաշրջանի և, առաջին հերթին, Ադրբեջանի համար»,- ընդգծել է Հ. Արշադին։
Հրապարակման պատրաստեց 168.am-ը
