Հնդկաստանը հակազդում է Թուրքիային՝ ամրապնդելով կապերը Հունաստանի, Կիպրոսի և Հայաստանի հետ
Թուրքիան, ամենայն հավանականությամբ, խոչընդոտել է հնդկական բանակին AH-64E Apache վեց ուղղաթիռից բաղկացած երկրորդ խմբաքանակի մատակարարմանը։ 2020 թվականին պատվիրված և դեպի Հնդկաստան ուղևորվող բեռնատար ինքնաթիռը հանկարծակի հետ է շրջվել։
Անունը չնշած աղբյուրը EurAsian Times-ին հայտնել է, որ Ան-124-ը մեկ շաբաթ մնացել է Անգլիայում, նախքան ԱՄՆ վերադառնալը, քանի որ Թուրքիան հրաժարվել է օդային տարածքով անցնելու թույլտվություն տրամադրել ուղղաթիռներ տեղափոխող բեռնատար ինքնաթիռին։
Աղբյուրը դա բացատրել է «Հնդկաստանի և Թուրքիայի հարաբերությունների ներկայիս վիճակով»։
Հնդկաստանի և Թուրքիայի հարաբերությունները հասել են անկման նոր կետի 2025 թվականի մայիսին տեղի ունեցած քառօրյա պատերազմի ժամանակ Պակիստանի հետ Անկարայի բացահայտ դաշինքից հետո։ Թուրքիան ոչ միայն հրապարակավ դատապարտեց Հնդկաստանի հարվածները «Սինդուր» գործողության շրջանակում, որը սկսվել էր ի պատասխան Պահալգամի ահաբեկչությանը, այլև Իսլամաբադին ռազմական օգնություն տրամադրեց, այդ թվում՝ տասնյակ անօդաչու թռչող սարքեր։
Սարսափելի ահաբեկչություններից հետո Թուրքիայի կողմից Իսլամաբադին ցուցաբերած աննախադեպ դիվանագիտական, ռազմական և քարոզչական աջակցությունը յուղ լցրեց կրակի վրա՝ վատթարացնելով հարաբերությունները։
Սկզբում Հնդկաստանն արձագանքեց՝ արգելափակելով որոշ թուրքական ԶԼՄ-ների հաշիվները X-ում, որոնք, ըստ հաղորդումների, «կեղծ լուրեր» էին տարածում, և չեղարկելով «Չելեբի Էյրփորթ Սերվիսիզ» ընկերության անվտանգային հավատարմագրումը։ Ավելի ուշ հնդիկ առևտրային հարյուրավոր առաջատար գործիչներ հայտարարեցին դեպի Թուրքիա ճանապարհորդությունների, բիզնեսի և մշակութային փոխգործակցության լիակատար բոյկոտի մասին։
Բացի այդ, Հնդկաստանը հակազդում է Թուրքիային՝ ամրապնդելով կապերը նրա տարածաշրջանային մրցակիցների՝ Հունաստանի, Կիպրոսի և Հայաստանի հետ։
News.am
