Որոշումը «փլավքամիչի» դեր է տանում՝ զտում են մարդկանց. մեծ գումարներ են լվանում, ոչ ոք չգիտի՝ այդ գումարներն ո՞ւր են գնում. Վահագն Սահակյան

Նախորդ տարի հունվարի 1-ից Երևանի ավտոկայանատեղիներում կայանելու համար ուժի մեջ մտան նոր դրույքաչափերը։ Սահմանվեց, որ «Ա» գոտում 1 ժամ կայանելու համար վարորդները կվճարեն 300 դրամ, 1 օրվա համար` 2000 դրամ, 1 շաբաթվա համար` 5000 դրամ, իսկ 1 ամսվա համար` 18.000 դրամ։ 1 տարվա համար կայանելու համար սահմանվեց 160.000 դրամ։ Ի սկզբանե քաղաքային իշխանությունը հայտարարում էր, որ այդ քայլին գնացել է, որպեսզի բեռնաթափի Երևանի կենտրոնը։

Արդեն 1 տարուց ավելի է՝ գործում է այս օրենքը, բայց Երևանի կենտրոնը ոչ մի կերպ չի բեռնաթափվել, նույնիսկ տարեկան 160.000 դրամ վճարած քաղաքացիները չեն կարողանում ազատ կայանատեղի գտնել Կենտրոնում։

Հայաստանի տաքսի ծառայությունների ճյուղային միության նախագահ Վահագն Սահակյանը հիշեցրեց՝ ի սկզբանե հայտարարել էր, որ նման քայլով հնարավոր չէ բեռնաթափել Երևանի կենտրոնը։

«Ասել եմ՝ այս որոշումը, կոպիտ ասած, կարող է միայն «փլավքամիչի» դեր տանել, այսինքն՝ զտում են մարդկանց։ Չունևորները քաշվում են ծայրամասերը, իսկ այն մարդիկ, ովքեր հեշտ են գումար վաստակում, հայտնվում են Կենտրոնում։ Քայլեք Երևանի կենտրոնով, տեսեք՝ որևէ փողոցում ազատ տեղ կա՞, չե՛ք գտնի։ Սա ուղղակի իշխանությունների համար հավելյալ գումար աշխատելու տարբերակ էր, այդ գումարներն էլ գնում են բյուջե, որին որևէ մեկը չի կարող հետևել։ Քաղաքացին չգիտի՝ այդ գումարներն իրականում քաղաքի՞ն են ծառայում, թե՞ որոշ մարդկանց։ Ինքս այս դեպքում հակված եմ երկրորդ տարբերակին»,- 168.am-ի հետ զրույցում ասաց Վահագն Սահակյանը։

Նա վստահ է՝ քաղաքային իշխանությունը շատ լավ տեսնում ու հասկանում է, որ տվյալ որոշումը քաղաքի բեռնաթափման հարցում որևէ դեր չի խաղացել, բայց շարունակում է գործել։

«Մեր գրասենյակը Կենտրոնում է, ինքս ո՛չ այն ժամանակ էի տեղ գտնում կայանելու, ո՛չ էլ հիմա, երբ գործում է այդ որոշումը։ Կրկնում եմ՝ միանշանակ այդ որոշումն իր նպատակին չի՛ ծառայել ու չի՛ էլ ծառայելու։

Մեզ ոչ մեկը չի իրազեկում, թե այդ գումարներն ուր են գնացել, ինչ նպատակով, ում են փոխանցել։ Ինչպես Կառավարությունն է ամբողջ գումարները տանում ու բանկերի միջոցով լվանում, այնպես էլ սա է։ Եկամտահարկի վերադարձ, ինչ-որ ջերմոցատների սուբսիդավորում և այլն, սրանք ի՞նչ են, սրանք լվացքատներ են, պետական բյուջեի փողերը տանում-գցում են բանկերն ու ասում, թե մարդկանց օգնել են, ու այդ ճանապարհով գումարներ են լվանում։ Մենք բյուջե գումար ենք տալիս, որ զենք առնեն, զորք պահեն, իրենք տանում ու տալիս են կոմերցիոն բանկերին։

Երևի բացի քաղաքապետից, որևէ մեկը չի կարող պատասխանել հարցին, թե այս մեկ տարվա ընթացքում որքան գումար է հավաքագրվել, նա էլ չի ասում։ Ինչպես պղնձամոլիբդենայինի գումարները տվեցին այդ նույն մարդուն՝ Ավինյանին, հետո դրանք փոշիացվեցին, Փաշինյանն էլ ասաց, թե խայտառակություն է, հիմա էլ է նույնը։ Սա էլ հաջորդ խայտառակությունն է, անունը դնում են խայտառակություն ու վերջ»,- շեշտեց մեր զրուցակիցը։

Այս համատեքստում Վահագն Սահակյանը նաև հիշեցրեց տաքսի ծառայությունների վճարն օնլայն դարձնելը, հետո էլ Նիկոլ Փաշինյանը հայտարարում էր, թե 3 ամսում 23 մլն «չեկ» է տպվել՝ զարմանալով, թե արդյո՞ք ճիշտ է։

«Մեր երկիրը վերածվել է մեծ թատերաբեմի, որտեղ «բեմադրիչներն» ու «դերասանները» մեծ գումարներ են լվանում»,- ընդգծեց Վահագն Սահակյանը։