«Գրությունը եկել է մեզ և Նկարիչների միությանը, քննարկում ենք, թե ինչ ենք անելու». Էդվարդ Միլիտոնյան
Հայաստանի գլխավոր դատախազությունը որոշել է պետականացնել մի շարք միությունների շենքեր։ Դրա վերաբերյալ այս պահին Դատախազությունից գրություններ են ուղարկվել Նկարիչների և Գրողների միություններին։
Հիշեցնենք, որ թե գրողների, և թե նկարիչների միություններն օրենքով հասարակական կազմակերպություններ են, իսկ նման կազմակերպությունները որպես սեփականություն՝ կարող են ունենալ շենքեր, շինություններ և այլն: Իսկ հասարակական կազմակերպության սեփականությունը գոյանում է մուտքի վճարներից, անդամավճարներից և օրենքով չարգելված այլ աղբյուրներից:
Այդուհանդերձ, միությունների զբաղեցրած տարածքը՝ շենքերը, պետականացնելու որոշումը կայացվել է այն ժամանակ, երբ որոշվեց օպտիմալացնել բուհերը, գիտական կենտրոնները։
168.am-ի հետ զրույցում Գրողների միության նախագահ Էդվարդ Միլիտոնյանն ասաց, որ ստեղծագործական միությունների նախագահները միասին քննարկում են հարցը։
«Հիմա մենք այդ հարցը քննարկում ենք, լրատվություն է գնացել, տարածվել է, բայց կոնկրետություն դեռ չկա։
Մենք հիմա բոլորս կորոշենք, թե հարցն ինչպես ներկայացնենք, որովհետև գրությունը եկել է մեզ և Նկարիչների միությանը, մյուսներին դեռ չի եկել։ Դրա համար զրուցում ենք, հասկանալու՝ ինչ ենք անելու»,- նշեց Էդվարդ Միլիտոնյանը։
Նկարիչների միության նախագահի տեսակետը կներկայացնենք առաջիկայում։
