Գունավոր հեղափոխությունները նախապատրաստում է Արևմուտքը, շահում է Ռուսաստանը. Աբրահամ Գասպարյան

«Պրեսսինգ» հաղորդաշարում Սաթիկ Սեյրանյանի հյուրը  «Ջենեսիս Արմենիա» ուղեղային կենտրոնի և ABC media-ի ղեկավար, քաղաքական գիտությունների թեկնածու, դոցենտ  Աբրահամ Գասպարյանն է։

Հարցազրույցի հիմնական թեզերը՝ ստորև.

• Տարածաշրջանը գտնվում է վառվող տակառի վրա, և Արցախի նախագահ Սամվել Շահրամանյանի՝ հոկտեմբերի 19-ի հրամանագիրն Արցախի լուծարումը լուծարելու մասին՝ կամ կոչված է կանխել հնարավոր պատերազմը, կամ ընդհակառակը, հրահրել նոր պատերազմ։

• Ադրբեջանի ձգտումներին ի պատասխան՝ Արցախի Ազգային ժողովի նախագահ Դավիթ Իշխանյանը և նախագահ Սամվել Շահրամանյանը մինչև վերջ պնդել են՝ Ազգային ժողովը չի կարող Արցախը լուծարելու որոշում ընդունել, վավերացնել։ Ի վերջո, Սամվել Շահրամանյանն իր վրա վերցրեց դա, ու ինչպես ստորագրել էր, այնպես էլ կատարեց հակընդդեմ քայլը՝ այսօր չեղարկելով Արցախը լուծարելու մասին հրամանագիրը:

• Նիկոլ Փաշինյանը Հայաստանը հասցրեց այնտեղ, որ մենք սեղանի տակ բանակցենք։

• Արևմուտքը որդեգրել է նեոանակոնդայի քաղաքականություն։ Ռուսաստան-Արևմուտք առճակատման, պրոքսի պատերազմները մի քանի ճակատներով են լինում։ Ռուսաստանը չի կարող բաց թողնել իր շահերը, օրինակ՝ 12.3 տրիլիոնանոց գազի փաթեթը։ Կոնֆլիկտների թեժացման պոտենցիալը դեռ չի սպառվել։ Այս համատեքստում է պետք դիտարկել Ռուսաստանի արտաքին քաղաքականությունը։

• Ես չգիտեմ՝ ով է Սամվել Շահրամանյանի կամ արցախյան կողմի արտաքին կուրատորը, ո՞ւմ հետ են նրանք կապ հաստատում, բայց Արցախի ճակատագրի հետ կապված՝ թե՛ Արևմուտքում, թե՛ Ռուսաստանում հասկանում են, որ պետք է լուծում, որովհետև այն, ինչ տեղի ունեցավ, լուծում չէր։

• Չեմ բացառում, որ Արևմուտքի ու Ռուսաստանի միջև կոնսենսուս լինի Արցախի կարգավիճակի հարցում։ 

• Արցախի հարցի կարգավորումը չի լինելու առանց կարգավիճակի հստակեցման։

• Արցախի հարցը չի փակվել, և միայն ՀՀ գործող իշխանությունն է իր ագիտպրոպով խեղդում այդ հարցը։

• Արևմուտքը Հայաստանից ժեստ է պահանջում՝ կոնկրետ քայլերի տեսքով։

• Ես լավ եմ հիշում, երբ 2017թ․նոյեմբերի 24-ին CEPA-ի թարմացված պայմանագիրը ստորագրվեց Բրյուսելում, մեր դիվանագետները բանակցությունների սրահից դուրս եկան առավոտյան ժամը 06:00-ին։ Ու եվրոպացիներն ասում էին՝ հալալ է ձեր դիվանագետներին։

• Այս իշխանությունների գործողությունների արդյունքում Հայաստանը կարող է դառնալ ոչ վստահելի, մարգինալ պետություն: Երբ դու դառնում ես մարգինալ պետություն, հեղինակազրկվում ես, դառնում ես անցանկալի տարածաշրջանի պետությունների համար։

• Ի՞նչ է նշանակում՝ ես Արևմուտքին կգցեմ․ դու ո՞վ ես, որ նման բան մտքովդ անցկացնես… Քանի որ Նիկոլը «իզմ»-եր չունի, նա մեկ այստեղ է թռչում, մեկ՝ այնտեղ, բայց դեռևս ընդունելի է բոլոր կողմերի համար։

• Արցախը հիմա կարող է դառնալ Ուկրաինայում ռազմական գործողությունների փոխակերպման առաջամարտիկն այս տարածաշրջանում։ Հիմա խաղաքարտեր են խառնվում։

• Պասը տվեց Լուկաշենկոն, Նիկոլը վերցրեց, պատասխանեց Հ1-ին տված իր հարցազրույցով…

• Վատ չէր լինի, եթե Երևանից Սամվել Շահրամանյանը հայտարարեր, որ պատրաստ է եվրոպական որևէ երկրում Ադրբեջանի հետ քննարկել արցախցիների վերադարձի պայմանները։ Ու դա պետք է անել միջազգային հովանոցի ներքո։

• Ադրբեջանի գլխին այս տարածաշրջանում մեծ աղետ կարող է պայթել, որովհետև ոչ ոք չի կարող մարսել մեկ գիշերում 120.000 մարդու տեղահանությունն իր հայրենիքից։

• Քանի Արցախը կա, Հայաստանը հետաքրքիր է միջազգային հանրության համար։

• Իրանը խնդիր ունի իր հյուսիսային սահմաններից՝ Սյունիքից քշել Ադրբեջանի ներխուժման իրական սպառնալիքը։

• Արցախն ու Սյունիքը կարող են դառնալ հակաիրանական ագրեսիայի պոլիգոն։

• 2016թ.-ից Նիկոլ Փաշինյանը կատարում է այնպիսի գործողություններ, որոնք համահունչ են Ռուսաստանի՝ Հարավկովկասյան տարածաշրջանի վերաբերյալ վարած քաղաքականությանը։

• Զելենսկին ո՞ւմ մարդն է… Արևմուտքի։ Բայց արդյունքը եղավ այն, որ ՆԱՏՕ-ի ամենամեծ հակահարձակումը տապալվեց, որը լինելու էր ՌԴ-ի համար Նոր Ստալինգրադ։ 

• Գունավոր հեղափոխությունների պատմությունը ցույց է տալիս, որ դրանք նախապատրաստում է Արևմուտքը, բայց դրանցից շահում է Ռուսաստանը։ 

• Կա պլան, և կա կապիկության հատված… Հայաստանի իշխանությունների հակառուսականությունը դրա մասին է։

• Ռուսաստանն իր ձեռքում է ուզում պահել Արցախյան խնդիրը՝ հակազդելու համար Ադրբեջանի թյուրքացմանը և նրա ազդեցության՝ տարածաշրջանում մեծացմանը։

• Արցախի ժողովուրդը ֆորս-մաժոր ստեղծեց բոլորի համար, առաջին հերթին՝ Ռուսաստանի։ Ռուսաստանը շահագրգռված է, որ արցախցիները վերադառնան։ Եթե դա տեղի չունենա, ՌԴ-ին սպասում է ղարաբաղացում, և հայտնի չէ, թե այդ ֆեդերատիվ պետության սահմանադրաիրավական ճակատագիրն ինչպիսին կլինի։ 

• Ռուսաստանը պահել է և հիմա էլ պահում է Փաշինյանին ու կպահի դեռ։ Արևմուտքը՝ նույնպես։ Սա այն կոնսենսուսային թեկնածուն է, որ ձեռք է տալիս, Հայաստանից բացի, բոլորին։

• Եթե Նիկոլ Փաշինյանը կարողանա լուծել Հայաստանում արևմտյան, այսպես կոչված, հիմնադրամների ֆինանսները վերահսկելու հարցը, նա կմնա վարչապետ՝ Ռուսաստանի համաձայնությամբ։

• Նիկոլը ՔՊ-ում հիմա ունի 3 անձ, ում վստահում է, և ովքեր գիշեր-ցերեկ աշխատում են նրա համար՝ Արայիկ Հարությունյան, Սուրեն Պապիկյան ու հայտնի մականունով Ռոմանոսը։ ՔՊ-ի ներսում Նիկոլը շատ քիչ մարդիկ ունի, և հենց ՔՊ-ի մեծամասնությունը տեսնի՝ Նիկոլի դիրքերը թուլանում են, անմիջապես ճամբարափոխ կլինի։

Մանրամասները՝ տեսանյութում։