«Կան հարցեր, որտեղ միջնորդների առկայությունը պարտադիր է». Մնացական Սաֆարյան
Այսօր խորհրդարանում լրագրողների հետ զրույցում ՀՀ փոխարտգործնախարար Մնացական Սաֆարյանը խոսեց հայ-ադրբեջանական սահմանին կողմերի միջև հանդիպման մասին Ադրբեջանի արտգործնախարարության վերջին առաջարկի մասին։
Երեկ արդեն Հայաստանի արտգործնախարարությունը դրա վերաբերյալ հայտարարություն արել և տվել է պարզաբանումներ։
«Մեր կողմից նաև առաջարկվել է անցկացնել սահմանազատման և սահմանային անվտանգության հանձնաժողովների նիստ նոյեմբերի 30-ին։ Սրա վերաբերյալ նույնպես եղել է հայտարարություն։
Հանձնաժողովի աշխատանքների վերաբերյալ նույնպես եղել են մամուլի հաղորդագրություններ, երկու կողմերի միջև քննարկված հանձնաժողովի նիստերի արդյունքներով, կարող եք դրանց ծանոթանալ»,- նշեց Մնացական Սաֆարյանը։
Հարցին՝ Հայաստանի համար ընդունելի է առանց միջնորդների հանդիպումը՝ Փաշինյան-Ալիև մակարդակով, Մ. Սաֆարյանը պատասխանեց՝ կրկին մեջբերելով ՀՀ ԱԳ նախարարության հայտարարությունը և հիշեցնելով, որ ադրբեջանական կողմը հրաժարվել է Գրանադայում և Բրյուսելում Փաշինյանի հետ միջնորդավորված հանդիպումներից։
«Եթե անհրաժեշտ լինի հավելյալ դիրքորոշումների վերաբերյալ, ապա կտրվեն պարզաբանումներ։
Արտգործնախարարի մակարդակով հանդիպման վերաբերյալ տեղեկատվություն դեռևս չկա»,- հավելեց պաշտոնյան։
Իսկ սահմանազատման և սահմանագծման հանձնաժողովի հանդիպումն Ադրբեջանի հետ սահմանին, փոխարտգործնախարարի բնորոշմամբ, կառուցողականության դրսևորում է։
«Մենք բազմիցս նշել ենք, որ կան հարցեր, որտեղ միջնորդների առկայությունը պարտադիր է»,- եզրափակեց թեման արտաքին գերատեսչության պաշտոնյան։
Նորից հարց հնչեց ՀԱՊԿ նիստին չմասնակցելու վերաբերյալ, և Մնացական Սաֆարյանն ասաց.
«Մեր որոշումները տարբեր ֆորմատներում և հարթակներում մասնակցության վերաբերյալ կայացվում են՝ ըստ դրանց նպատակահարմարության»։
Անդրադառնալով ՌԴ-ից հնչող տարբեր հայտարարություններին, թե Հայաստանը փոխում է արտաքին քաղաքական վեկտորը, Մնացական Սաֆարյանը հակադարձեց՝ դա իրենց գնահատականն է.
«Մենք դրանց վերաբերյալ տվել ենք մեր գնահատականներն ու դիրքորոշումները»։
