1,5 մլն վարձատրության ավելացում եմ ունեցել. գնացեք մեկ անգամ էլ լսեք. Նիկոլ Փաշինյան

Hetq.am-ի փոխանցմամբ, Նիկոլ Փաշինյանն ու փոխվարչապետները 2025թ. 51.6 մլն դրամ պարգևավճար են ստացել: Ընդ որում, Նիկոլ Փաշինյանը մոտ 11 մլն 951.000 դրամ պարգևավճար է ստացել՝ 2025թ. առաջին կիսամյակի կատարողականի գնահատման արդյունքային ցուցանիշների համար: Դրանից բացի՝ մոտ 1 մլն 970.000 դրամ էլ առանձին տողով է պարգևատրվել:

Կառավարության նիստից հետո Նիկոլ Փաշինյանի հրավիրած ճեպազրույցի ժամանակ լրագրողները, ամեն դեպքում, հետաքրքրվեցին՝ որքա՞ն պարգևավճար է Փաշինյանն ինքն իրեն տվել Ամանորին, և արդյո՞ք պարգևավճար ստացող բարձր պաշտոնյաների աշխատանքը համահունչ է իրենց կատարած աշխատանքին, երբ թոշակներ չեն բարձրացվում:

Այս հարցադրմանն ի պատասխան՝ Փաշինյանն ասաց, որ ներդրվել է կատարողականի հիման վրա վարձատրության նոր համակարգ, որի ներդրումն ունի մի քանի նպատակ, որից առաջինը կառավարության գործունեության և նրա ծրագրի իրականացումն առավել արդյունավետ դարձնելն է, որը 2018 թվականից իրենց որդեգրած «զրո կոռուպցիա և զրո հանդուրժողականություն կոռուպցիայի նկատմամբ» քաղաքականության գործնական շարունակությունն է:

«Մենք որդեգրել ենք անբասիր և որևէ ազդեցությունից զերծ պաշտոնյայի տեսլականը, և այն իրականացնելու և կառավարության աշխատանքի արդյունավետությունը բարձրացնելու համար մենք համարում ենք այդ որոշումն անհրաժեշտ: Հաջորդ հիմնավորումն այն է, որ մենք պետական համակարգում մրցունակությունը շարունակաբար պետք է բարձրացնենք, քանի որ պետական համակարգից որակյալ աշխատողների արտահոսք կա դեպի մասնավոր»,- շեշտեց Փաշինյանը՝ հավելելով, որ շատ հաճախ պետական պաշտոնյաներն իրենց իրավունքները դատական կարգով պաշտպանելու համար լուրջ ծախսեր պիտի կատարեն, որոնք դրական վճռի դեպքում ամբողջությամբ չեն վերադարձվում:

«Իհարկե, դատական կարգով հասել են լուծումների, բայց 1-1.5 միլիոն դրամ են ծախսել, բայց դատարանները փոխհատուցել են դատական ծախսերի 10-20 տոկոսը: Մյուս կողմից, տեսնում ենք, որ հայտնի շրջանակները բազմամիլիոն դրամների հայցեր են ներկայացնում պետական պաշտոնյաների դեմ, ինչը պետական համակարգը կաթվածահար անելու հիբրիդային սպառնալիք է»,- շարունակեց նա:

Ինչ վերաբերում է իրեն, Փաշինյանն ասաց. «Ես ինքս ինձ չեմ պարգևատրել, պետական որոշման շրջանակներում ես ամսական 1.5 մլն դրամի չափով վարձատրության ավելացում եմ ստացել»։

Մանրամասները՝ տեսանյութում