Սահմանամերձ համայնքների բնակիչները կշարունակեն աջակցություն ստանալ կոմունալ վճարումների և այլ ծախսերի համար
Կառավարությունը առաջարկում է երկարաձգել Հայաստանի Հանրապետության սահմանամերձ 82 համայնքների և բնակավայրերի սոցիալական աջակցության տրամադրումը։
Ազգային ժողովի հերթական նիստին «Սահմանամերձ համայնքների սոցիալական աջակցության մասին» օրենքում փոփոխություն կատարելու մասին» օրենքի նախագիծը ներկայացրեց ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանը: Ըստ օրենքի նախագծի՝ սահմանամերձ համայնքների և բնակավայրերի բնակիչները կշարունակեն ստանալ փոխհատուցում բնական գազի, էլեկտրաէներգիայի, ոռոգման ջրի դիմաց, ինչպես նաեւ օգտվել ՀՀ կառավարության որոշմամբ սահմանված այլ փոխհատուցման ծրագրերից:
Տերտերյանը նշեց, որ վերոնշյալ օրենքը գործում է 2015 թվականից, օրենքի գործողության ժամկետը երկու անգամ երկարաձգվել է:
«Նախագծով առաջարկվում է ևս 3 տարով երկարաձգել գործող օրենքի ժամկետը»,- նշեց Տերտերյանը։
Համաձայն գործող օրենքի` 2024 թվականի հունվարի 1-ից ժամկետն ավարտվում է:
