ՀՀ-ն մերժում է ադրբեջանցիների վերադարձի իրավունքը. Ալիևը` Կաումային
Ադրբեջանն այժմ ներկայացրել է հստակ և թափանցիկ ծրագիր՝ կապված վերադարձի և համակեցության իրավունքի հետ։ Ինչպես հաղորդում է ԱՊԱ-ն, այս մասին հայտարարել է Ադրբեջանի նախագահ Իլհամ Ալիը՝ ԵԱՀԿ Խորհրդարանական վեհաժողովի նախագահ Պիա Կաումային հյուրընկալելիս։
Նա կրկին մեղադրանքն է հասցեագրել հայկական կողմին։
«Չնայած այն հանգամանքին, որ Ադրբեջանը ներկայում ներկայացնում է վերադարձի և համակեցության իրավունքի վերաբերյալ հստակ և թափանցիկ ծրագիր, Հայաստանը մերժում է ադրբեջանցիների՝ Հայաստան վերադառնալու իրավունքը և որևէ տեսակետ չի ներկայացրել այդ կապակցությամբ»,-նշել է Ալիևը։
Միաժամանակ, Ադրբեջանի ղեկավարն ընդգծել է, որ Բաքուն Հարավային Կովկասում կայուն խաղաղության կողմնակից է, աջակցում է տարածաշրջանային խաղաղության օրակարգին, հարաբերությունների կարգավորմանը և Հայաստանի հետ խաղաղության պայմանագրի ստորագրմանը։
