Տոկիոյում ՆԱՏՕ-ի ներկայացուցչություն բացելու հարցը շարունակում է օրակարգում մնալ
Տոկիոյում ՆԱՏՕ-ի` Ասիայում առաջին մշտական ներկայացուցչություն բացելու հարցը օրակարգից հանված չէ, սակայն որոշման կայացումը ժամանակ է պահանջում։
Այդ մասին NHK հեռուստաընկերությանը տված հարցազրույցում հայտարարել է Հյուսիսատլանտյան դաշինքի գլխավոր քարտուղարի օգնական Դևիդ վան Վիլը, որն այցով գտնվում է Ճապոնիայում։
«Տոկիոյում ներկայացուցչություն բացելու հարցը քննարկումից չի հանվել։ Ընդհանուր առմամբ ՆԱՏՕ-ն դրականորեն է վերաբերվում նման որոշմանը: Սակայն դրա մշակման գործընթացը ժամանակ կպահանջի»,- ասել է նա:
Գլխավոր քարտուղարի օգնականը հիշեցրել է, որ ՆԱՏՕ-ի անդամ 31 երկրների թվում այս առիթով տարբեր կարծիքներ կան։
Նա հայտնել է, որ մի քանի շաբաթվա ընթացքում ենթադրվում է անցկացնել Ճապոնիայի և Հյուսիսատլանտյան դաշինքի ներկայացուցիչների հանդիպում կիբերանվտանգության վերաբերյալ։
