ԱՄԷ-ի և Թուրքիայի առևտրաշրջանառության ծավալները հասել են 18 մլդ դոլարի
Արաբական Միացյալ Էմիրությունների (ԱՄԷ) արտաքին առևտրի պատասխանատու, պետնախարար Թանի բին Ահմեդ Ալ Զեյուդին անդրադարձել է Թուրքիայի և ԱՄԷ-ի միջև առկա առևտրաշրջանառության ծավալներին: Այս մասին տեղեկացնում է ermenihaber.am-ը։
Զեյուդին նշել է, որ դրանք հասել են 18 մլրդ դոլարի, ընդ որում այդ թիվը վերաբերում է այն ծավալներին, որոնք չեն ներառում նավթային վաճառքները:
«Ընթացիկ տարվա միայն 1-ին կեսին երկկողմ առևտուրը կազմել է 13.5 մլրդ դոլար: Մենք ցանկանում ենք մասնավոր հատվածի միասնական աշխատանք ապահովել՝ այլ տեսանկյունից դիտարկելով տարբեր շուկաներ»,-ասել է նա:
Բացի այդ, ԱՄԷ-ի պետնախարարը վստահություն է հայտնել, որ 5 տարի անց երկու երկրների միջև առևտրաշրջանառության ծավալներն էլ ավելի են մեծանալու՝ հասնելով 40 մլրդ դոլարի:
Զեյուդին նաև Թուրքիային համարել է Ծոցի տարածաշրջանում ԱՄԷ-ի համար ամենակարևոր առևտրային գործընկերներից մեկը:
Նշենք, որ Թուրքիայից ԱՄԷ արտահանվող ապրանքները կազմում են այդ երկրի ներկրած սպառողական ապրանքների 58.6 տոկոսը:
