«Հիմա Ադրբեջանն ամբողջ աշխարհի առջև ասում է, որ թքած ունի Հաագայի դատարանի որոշման վրա, սա է իրավիճակը». Դավիթ Բաբայան

92-րդ օրն է՝ Արցախը գտնվում է Ադրբեջանի կողմից շրջափակման մեջ՝ ադրբեջանական «բնապահպանները»  փակել են Արցախն արտաքին աշխարհին կապող միակ ցամաքային ճանապարհը։ 120 հազար արցախահայեր 3 ամսից ավելի  գտնվում են հումանիտար աղետի մեջ։

Փետրվարի 22-ին Արդարադատության միջազգային դատարանը ժամանակավոր միջոց կիրառելու Հայաստանի ներկայացրած հայցը մասնակի բավարարելով՝  որոշում էր ընդունել՝ պարտավորեցնելով Ադրբեջանին իր ստանձնած պարտականությունների շրջանակներում ապահովել տրանսպորտի և մարդկանց անխափան երկկողմանի տեղաշարժը Լաչինի միջանցքով։ Սակայն Ադրբեջանը չի շտապում կատարել միջազգային դատարանի որոշումը։ Միջազգային իրավական համագործակցության հարցերով ՀՀ ներկայացուցիչ Եղիշե Կիրակոսյանն օրերս ասուլիսի ընթացքում ասել էր՝ չնայած որոշման կատարման վերաբերյալ ժամկետ նշված չէ, ինչը նշանակում է, որ այն պետք է կատարվի որոշման ընդունումից անմիջապես հետո։

168.am-ի հետ զրույցում Արցախի Հանրապետության նախագահի խորհրդական, հատուկ հանձնարարությունների գծով ներկայացուցիչ Դավիթ Բաբայանը խոսելով Հաագայի դատարանի որոշումն իրագործելուն ուղղված Արցախի քայլերի մասին, նկատեց՝ ձևեր կան, սակայն դա տեսական է։

«Պրակտիկայում Հաագայի դատարանի որոշումը Ադրբեջանի համար առոչինչ է։ Հիմա այդ նույն Հաագայի դատարանն առհասարակ հետաքրքրվո՞ւմ է՝ իր որոշումն իրականացնո՞ւմ են, թե՞ ոչ: Չի իրականացնում, ավելին՝ Արցախին մատակարարվող գազը նորից անջատում է։ Սրանք էլ ասում են՝ ապացույցներ չկան, որ գազը նորից Ադրբեջանն է անջատում։ Դե թող Հաագայի դատարանը մտածի՝ հաստատակա՞մ է իր որոշումներում, թե՞ հաստատակամ չէ։ Հիմա Ադրբեջանն ամբողջ աշխարհի առջև ասում է, որ թքած ունի այդ որոշման վրա, սա է իրավիճակը։

Ամենայն հարգանքով արդարադատության, մարդու իրավունքների նկատմամբ, բայց դժբախտաբար, մենք տեսնում ենք, որ այդ ամենը ֆիկցիա է դարձել»,- նշեց Դավիթ Բաբայանը։

Խոսելով մարտի 5-ին Ադրբեջանի կողմից Արցախում իրականացված դիվերսիոն գործողության մասին, որի արդյունքում ոստիկանության վիզաների վարչության 3 աշխատակից էին զոհվել, և այդ համատեքստում Ադրբեջանի պահանջից, որ Արցախը պետք է տանի ինտեգրացիոն քաղաքականություն, Դավիթ Բաբայանն ասաց, որ նախ պետք է հասկանալ, թե ինչ է ինտեգրացիան։ Դասական առումով ինտեգրացիան ունի հետևյալ բաղադրիչները՝ նախևառաջ իրավահավասարություն։

«Հավասար կողմերը կարող են, չէ՞, հավատարմագրվել, երկրորդը՝ կամավորություն, այս բաղադրիչները կա՞ն, թե՞ ոչ, իհարկե չկան՝ Ադրբեջանը չի ընդունում իրավահավասարություն, մենք չենք ուզում ինտեգրացիա, Ադրբեջանը պարտադրում է։ Բացի դրանից, ինտեգրացիայի համար պետք է հարաբերությունները նորմալ լինեն, հետևաբար՝ մենք դեմ ենք ոչ թե ինտեգրացիա հասկացությանն առհասարակ, այլ չենք ուզում Ադրբեջանի հետ ինտեգրվենք։ Թող Ադրբեջանը ճանաչի Արցախի Հանրապետությունը, մենք լինենք ազատ երկիր և մասնակցենք տարբեր ինտեգրացիոն գործընթացների, բայց սա չի նշանակում, որ այդ ամենը պետք է լինի ի հաշիվ մեր ինքնուրույնության, անկախության։ Իսկ Ադրբեջանի ուզածը գաղութացումն է և Արցախի ոչնչացումն է։ Այսինքն՝ այդ ինտեգրացիա բառն ուղղակի խոսք է, Ադրբեջանն այդ բառի տակ հասկանում է կլանում, ոչնչացում, գաղութացում»,- հավելեց Դավիթ Բաբայանը։

Անդրադառնալով Բաքու-Ստեփանակերտ հումանիտար և տեխնիկական քննարկմանը և հարցին՝ այդ երկխոսությունը որևէ դրական արդյունք տվե՞լ է, Դավիթ Բաբայանը պատասխանեց.

«Մենք տեսանք, որ Բաքու-Ստեփանակերտ հումանիտար և տեխնիկական քննարկումից  հետո Ադրբեջանն Արցախում ահաբեկչություն իրականացրեց, որին զոհ գնաց երեք ոստիկան, որոնք վիզաների վարչությունից էին, այսինքն՝ որևէ կապ չունի զինված ուժերի հետ։ Դրանից հետո նաև փակել են գազամատակարարումը։ Մենք տեսնում ենք, որ Ադրբեջանը շարունակում է իր ապակառուցողական քաղաքականությունը, իսկ աշխարհը լուռ ու կույր է, եթե չասենք՝ առհասարակ անտարբեր է։ Ինչպե՞ս է ստացվում, որ աշխարհն այս կամ այն վայրում որևէ իրադարձություն տեղի ունենալուց, եթե իր շահերից է բխում, բարձրաձայնում է, այս մեկին ասում է՝  ագրեսոր է, այն մեկին՝ այլ բան։ Ադրբեջանն ամբողջ աշխարհի առջև կոտորած է իրականացնում, Միջազգային դատարանը որոշում է ընդունում, իսկ Ադրբեջանն ասում է՝ թքած ունեմ։ Ավելին՝ Եվրոպան Ադրբեջանին հայտարարում է իր ռազմավարական գործընկերը»։