«Սա նշանակում է՝ իշխող ուժը թքում է հայ ժողովրդի, Հայաստանի և Արցախի վրա». Անդրանիկ Թևանյան
«Հայաստանի Հանրապետությունը ստեղծվել է «Պայքար, պայքար մինչև վերջ» և «Միացում» կարգախոսների ներքո: Նշանակում է՝ պայքար այնքան, մինչև Արցախը կմնա հայկական և ի վերջո կմիավորվի մայր Հայրենիքին»,- «Հայաստանի իրական օրակարգը» հանրային քննարկման ժամանակ ասաց «Հայաստան» խմբակցության պատգամավոր Անդրանիկ Թևանյանը:
Նրա խոսքով՝ Ղարաբաղյան շարժման ալիքի վրա իշխանության գալուց հետո իշխանության ամենաբարձր մակարդակով հնչել է տեսակետ, որ Ղարաբաղը կարող է մնալ Ադրբեջանի կազմում:
«Սա կոչվում է քաղաքական անբարոյականություն ու, երբ դրան իրավական գնահատական չի տրվում, քաղաքական անբարոյական միջավայրում ստեղծված բացիլները կամ արտադրական թափոնը հետագայում գալիս է իշխանության՝ ինչպես եղավ 2018թ., և երկիրը տանում է այսպիսի փորձությունների, բերում այսպիսի ողբերգական հետևանքների: Երբ այսօր իշխող ուժերից լսում ենք տեսակետ, որ Արցախի ճանաչման շանս չի եղել ու չկա, սա խայտառակ քաղաքական անբարոյականություն է, սա նշանակում է՝ իշխող ուժը թքում է հայ ժողովրդի, Հայաստանի և Արցախի վրա»,- ասաց Անդրանիկ Թևանյանը:
