«Եթե մենք ինչ-որ նոր լողավազան ենք կառուցելու և հին լողավազանի կամ ջրհորի ջուրը բերելու ենք, լցնելու ենք դրա մեջ, ապա նա չի աշխատելու». Լուսինե Հակոբյան
![](https://168.am/wp-content/uploads/2020/08/Lusine-Hakobyan.jpg)
Մասնագիտացված հակակոռուպցիոն դատարանի ստեղծման թեմայով քննարկման ժամանակ փաստաբան, «Իրավունքի Եվրոպա» միավորման նախագահ Լուսինե Հակոբյանը կարծիք հայտնեց, թե այն չափանիշերը, որոնք սահմանված են առաջարկվող նախագծով, խնդրահարույց են:
Լուսինե Հակոբյանի կարծիքով՝ այն, որ հակակոռուպցիոն դատարանում դատավորի պաշտոնի համար դիմել չեն կարող այն փաստաբանները, որոնք վերջին 5 տարվա ընթացքում կարգապահական տույժերի են ենթարկվել, խիստ խնդրահարույց է, քանի որ, ըստ նրա, «հատկապես քաղաքական հնչեղություն ունեցող դատավարություններով փաստաբանները ենթարկվել են ճնշումների Փաստաբանների պալատի կողմից, որը մշտապես հանդես է եկել որպես գործիք առավել ակտիվ իրավունքների պաշտպանությամբ զբաղվող փաստաբաններին լռեցնելու համար»:
«Իրավունքի Եվրոպա» միավորման նախագահի խոսքով՝ խնդրահարույց են նաև դատավորների համար նման սահմանափակումները: Ըստ Լուսիե Հակոբյանի՝ երկակի ստանդարտներ կան նաև այս դեպքում:
«Կան դատավորներ, որոնք արտոնյալ են, ու որոնց նկատմամբ էդ կարգապահական գործընթացները չեն հարուցվում: Պետք ա բերեմ Ալեքսանդր Ազարյանի օրինակը, որը աջ ու ձախ հարցազրույցներով զսպվածության պարտականությունից դուրս տարբեր հայտարարություններ էր անում, սակայն ակնհայտորեն դրանք խախտումներ էին պարունակում, սակայն որևէ կարգապահական պատասխանատվություն չհետևեց: Եվ ըստ էս նախագծի, օրինակ, Ալիկ Ազարյանը շատ լավ էլ թեկնածու է և միգուցե և հայտնվի հակակոռուպցիոն դատարանում, և երբ Քոչարյանի վերաբերյալ կոռուպցիոն գործ քննվի, բացարկ էլի չհայտնի ու քննի էդ գործը»,- ասաց Լուսինե Հակոբյանը:
Փաստաբանն առաջարկեց վերանայել նախագծում առկա չափորոշիչները: Իսկ ինչ վերաբերում է մրցույթի արդյունքում ընտրված դատավորների ուսումնառության գործընթացին, Լուսինե Հակոբյանի խոսքով, այդ դասընթացները պետք է լինեն միջազգային գործընկերների ներգրավմամբ:
«Եթե մենք ինչ-որ նոր լողավազան ենք կառուցելու և հին լողավազանի կամ ջրհորի ջուրը բերելու ենք, լցնելու ենք դրա մեջ, ապա նա չի աշխատելու: Եվ էդ նկատառումից ելնելով՝ առնվազն անցումային փուլում, կարծում եմ, որ նման չափանիշեր չպետք ա սահմանվեն, այլ պետք ա սահմանվի որոշակի մասնագիտական պատրաստվածություն, որոշակի փորձառություն, բայց էս կարգապահական պատասխանատվությունները և այլն, սրանք չպետք ա սահմանվեն»,- նշեց Լուսինե Հակոբյանը: