Մայիսի 24-ին կունենանք մոտ 6350 դեպք, իսկ հունիսի 8-ին` մոտ 12.700 դեպք․ Արսեն Թորոսյան

Առողջապահության նախարար Արսեն Թորոսյանը սոցկայքի իր էջում գրառում է կատարել․

«Ամփոփելով կորոնավիրուսային հիվանդության տարածման վերջին օրերի միտումները, ուզում եմ տեղեկացնել, որ մենք այս պահին գտնվում ենք դեպքերի 15 օրյա կրկնապատկման փուլում: Դա նշանակում է, որ եթե այս միտումը պահպանվի, ապա մենք մայիսի 24-ին կունենանք մոտ 6.350 դեպք, իսկ հունիսի 8-ին` մոտ 12.700 դեպք:

Իհարկե, կունենանք նաև կորոնավիրուսային հիվանդությունից բուժված հազարավոր և դժբախտաբար նաև մահացած տասնյակ քաղաքացիներ, որոնցից ոմանք չի բացառվում, որ լինեն մեր տարեց կամ քրոնիկական հիվանդություններով մտերիմներն ու հարազատները, մեր հայրերը և մայրերը, մեր տատիկներն ու պապիկները (շաքարային դիաբետ, զարկերակային գերճնշում, սրտի իշեմիկ հիվանդություն, թոքերի քրոնիկ օբստրուկտիվ հիվանդություն և այն):

Այս ամենը շեշտում եմ, որպեսզի վերհիշենք մեր անփոփոխ օրակարգը` պահպանել բոլոր սահմանված կանոնները և դանդաղեցնել վիրուսի տարածումը:

Նոր վարքագիծ որդեգրելու այլընտրանքը վերոշարադրյալ կամ ավելի վատ սցենարն է: Մենք ստիպված ենք լինելու դեռ երկար ժամանակ պահպանել բոլոր կանոնները:

Հ.Գ. վաղը մի քանի ժամով անձամբ լինելու եմ կորոնավիրուսային հիվանդության բուժմամբ զբաղվող հիվանդանոցներից մեկում և ուղիղ եթերով ներկայացնելու եմ վերակենդանացման բաժանմունքում բուժվող պացիենտների հիվանդությունների պատմությունները»,- գրել է նա:

https://www.facebook.com/ATorosyanOfficial/posts/1220517858134477?__xts__[0]=68.ARB8qIvmwtDcfo6GL35V3OqCsJYADjZdcGsLmZ-XaiQ-X0ivcSU3T5QeOXjkfGNUy3eJyLENHpbiBa2PqZ16DtMqCBVzKnf3Juvd90j5ljDASoDD1Emh_UAUSg_Us6zFf9oyf-K_s0hpnJ9PGOhFsw0pFuX4pcM8rOcGtVfCTqjb6Wem4NWYB-4oiIVq1j_F_eyHSfye7eqhmB5cowVHHKepj59eU7t9VTDTap8Da1ZdEW8iVpEtbP29yISzhWFihkdITekrRdED6oa6ECqHGg2N_wJBI-ud2hgjLs35BYyWiV3NaLe9CFvj-HdG7KBM9GDgsXeqyDjt9m6KaXO7TWgpVg&__tn__=-R