Նիդերլանդների տասը քաղաքացու Թուրքիան արգելել է երկրից դուրս գալ
Նիդերլանդների քաղաքացի, ծագումով թուրք առնվազն տասն անձի Թուրքիայում թույլ չեն տալիս երկրից դուրս գալ: Այս մասին լրագրողներին հայտնել է Նիդերլանդների արտաքին գործերի նախարարության խոսնակը: Այս մասին հայտնում է գերմանական Deustche Welle-ն:
Հոլանդական NOS հեռուստաընկերության տվյալներով ընդհանուր առմամբ 100 երկքաղաքացի կա, ովքեր չեն կարողանում դուրս գալ Թուրքիայից:
Նիդերլանդների արտգործնախարար Բերթ Կոենդերսը խնդրի առնչությամբ ասել է, որ այդ անձանց օգնելու նպատակով հնարավոր ամեն բան անում են, նաև կապ են հաստատել թուրք բարձրաստիճան պաշտոնյաների հետ:
Թուրքիայից դուրս գալ արգելվող քաղաքացիների զգալի մասը մեղադրվում են գյուլենականների հետ առնչություն ունենալու մեջ:
Նիդերլանդների և Թուրքիայի միջև հարաբերությունները լարվել էին այն բանից հետո, ինչ սահմանադրական հանրաքվեին ընդառաջ թուրք նախարարների ելույթներն արգելվել էին Նիդերլանդներում: Իսկ Թուրքիայի աշխատանքի և սոցիալական քաղաքականության հարցերով նախարար Ֆաթմա Բեթյուլ Քայան առհասարակ երկրից արտաքսվել էր:
