Հանրահայտ պիցցա «Մարգարիտան»՝ ըստ նեապոլյան օրիգինալ բաղադրատոմսի

Պիցցան իտալական խոհանոցի այցեքարտն է, որն իրենից ներկայացնում է շրջանաձև հաց՝ ծածկված լոլիկի սոուսով (դասական տարբերակ) և պանրով (սովորաբար մոցարելա), ինչպես նաև այլ բաղադրիչներով: Համարվում է աշխարհի ամենահայտնի ուտեստներից մեկը: Ներկայացնում ենք հանրահայտ նեապոլյան «Պիցցայոլի» Ջովանի Իմպրոտայի օրիգինալ բաղադրատոմսը:

3-4 պիցցայի համար.

1. Ջուր – 250 մլ
2. Աղ – 15 գ
3. Ալյուր – 425 գ
4. Չոր գարեջրային խմորիչ – 2 գ

Խճողակ.

1. Պաստա (լոլիկի սոուս) – 350-400 գ
2. Մոցարելա – 3 գնդիկ (յուրաքանչյուրը՝ 125 գ)
3. Ձիթայուղ – 5 ճ/գ
4. Թարմ ռեհան

Պատրաստման եղանակը.

1. Առաջին հերթին աղը և խմորիչը հալեցնել ջրում: Շատ արագ ավելացնել ալյուրը (ըստ Ջովանի Իմպրոտայի՝ պետք է շատ արագ ալյուրը խառնել, որպեսզի խմորման գործընթացը չդանդաղի):

2. Ալյուրն ավելացնել աստիճանաբար աջ ձեռքով (Ջովանին դա անվանում է «լցնել անձրևի նման»), իսկ ձախ ձեռքով աստիճաբանար խառնել փայտե բահիկով:

3. Հետո խմորը դնել սեղանին և լավ հունցել: Խմորը պետք է ստացվի փափուկ և առաձգական:

4. Ծածկել խմորը խոնավ (ոչ թաց) սրբիչով և թողնել, որ հանգստանա:

5. Մեկ ժամից վերադառնալ և բաժանել խմորը 3-4 մասերի: Խմորները դնել սեղանի վրա և ծածկել պլաստիկե անցքերով կոնտեյներներով: Թողնել խմորը 11-12 ժամ, որպեսզի հասունանա:

Թխելուց 30 րոպե առաջ ջեռոցը տաքացնել մաքսիմալ ջերմաստիճանի: Պատրաստել 30-32 սմ տրամագծով կլոր կաղապարը:

6. Վերցնել առաջին խմորը և ձեռքերով դրան տալ շրջանի ձև: Տեղավորել այն կաղապարի մեջ (կաղապարը ոչնչով չպատել):

7. Տարածել խմորի վրա լոլիկի սոուսը, վրան ձիթայուղ լցնել և դնել ջեռոցի մեջ: Եթե ջեռոցը տաք է, թխել 5 րոպե:

8. Հանել, վրան ավելացնել մոցարելա պանիրը և ռեհանի տերևները և նորից դնել ջեռոցը ևս 2-3 րոպե:

Պատրաստեց Անի Գաբուզյանը