ԱՄՆ-ի ծովափնյա ջրերում հայտնաբերվել է Երկրորդ համաշխարհային պատերազմի ժամանակվա ռադիոակտիվ ավիակիր
Daily Mail-ի փոխանցմամբ` գիտնականները Կալիֆորնիայի ծովափնյա ջրերում` 800 մետր խորության վրա, հայտնաբերել են միջուկային փորձարկումներից հետո` 1946 թվականին, ջրասույզ արված Independence ավիակիրը:
Ռադիացիայով վարակված նավը, որը գործնականում մնացել է անվնաս, հայտնաբերել է ԱՄՆ-ի Օվկիանոսագրական ու մթնոլորտային հետազոտությունների ազգային վարչության արշավախումբը: Նավը հայտնաբերել է Echo Ranger ինքնավար ստորջրյա սարքը:
Հաղորդվում է, որ ծովի հատակին 64 տարի գտնվելուց հետո ավիակիրն ունի այնպիսի տեսք, որ կարծես թե պատրաստվում է օդ բարձրացնել իր ինքնաթիռները:
Independence-ը պատերազմական երկար (1943-1945 թվականներ) ուղի է անցել Խաղաղ օվկիանոսում, ապա վերապրել է ատոմային երկու պայթյուն:
1946 թվականին նրան ընդգրկել են այն թիրախային նավախմբի մեջ, որը նախատեսված է եղել Բիկինի ատոլում ատոմային ռումբի փորձարկման համար:
Նավը հեռու է գտնվել առաջին պայթյունի էպիկենտրոնից, ինչի համար էլ չի խորտակվել: Այդ պատճառով նավը երկրորդ անգամ է փորձարկվել և վերստին խուսափել է խորտակվելուց:
Դրանից հետո նավը բուքսիրի միջոցով հասցվել է Սան Ֆրանցիսկոս, ուր 4 տարի ապարդյուն փորձեր են ձեռնարկվել վարակազերծման ուղղությամբ: 1951 թվականի հունվարի 29-ին ռադիոկատիվ նավը ջրասույզ են արել օվկիանոսում, խոշոր նավահանգիստներից հեռու` Ֆարալոնյան կղզիների մոտ:
