Թուրքմենստանն իր գազը Եվրոպա արտահանելու շուրջ բանակցում է Ադրբեջանի ու Թուրքիայի հետ
Ադրբեջանական Trend լրատվական գործակալության փոխանցմամբ՝ Թուրքմենստանն Ադրբեջանի ու Թուրքիայի հետ բանակցում է իր գազի արտահանման եվրոպական ուղղվածության իրագործման շուրջ:
Այս մասին պաշտոնական այցով Աշգաբադում գտնվող Մոլդովայի նախագահ Նիկոլայ Տիմոֆտիի հետ հանդիպումից հետո հայտարարել է Թուրքմենստանի նախագահ Գուրբանգուլի Բերդիմուհամեդովը:
Նրա խոսքերով՝ Թուրքմենստանը գազ է վաճառում Ռուսաստանին, Իրանին ու Չինաստանին և դրա հետ մեկտեղ աշխատում է իր գազի արտահանման դիվերսիֆիկացման ուղղությամբ.
«Ներկայումս մենք եռակողմ բանակցություններ ենք վարում Ադրբեջանի ու Թուրքիայի հետ: Հուսով եմ, որ համաձայնության կգանք, և դա կլինի եվրոպական վեկտորի իրագործման ճանապարհին կատարված ևս մեկ քայլ: Թուրքմենստանը երբևէ օրակարգից չի հանել իր արտահանման եվրոպական վեկտորը»:
