Ներկայացվել են ՀՀ ԿԱ պետգույքի կառավարման վարչության 2014 թ. կատարված աշխատանքները
Վարչապետ Հովիկ Աբրահամյանի գլխավորությամբ կառավարությունում այսօր քննարկվել է ՀՀ կառավարությանն առընթեր պետական գույքի կառավարման վարչության 2014 թ. իրականացված աշխատանքների, գերակա խնդիրների, ՀՀ կառավարության 2014 թ. գործունեության միջոցառումների ծրագրի կատարման և գնահատված կատարողականի հաշվետվությունը:
ՀՀ ԿԱ պետգույքի վարչության պետ Արման Սահակյանը զեկուցել է, որ 2014 թ. ընթացքում վարչության կողմից պետական գույքի հաշվառման գրանցամատյանում հաշվառվել է 7455 անվանում անշարժ գույք, այդ թվում 14-ը՝ այլ երկրներում, 3-ը՝ ԼՂՀ-ում: Գրանցամատյանում հաշվառվել է 380 իրավաբանական անձանց կանոնադրական կապիտալում պետական բաժնեմասը (ընդհանուր պետական մասնակցության չափը կազմել է 119235334.3 հազ. դրամ), ինչպես նաև դրանց գույքի կազմում ընդգրկված 1923 անվանում անշարժ գույք (ընդհանուր մակերեսը՝ 1388385.28 քառ. մետր): Պետական կառավարչական և պետական այլ հիմնարկների հաշվեկշռում հաշվառված են 5887 անվանում ոչ նյութական ակտիվներ, 2841 տրանսպորտային միջոցներ և 12 ջրատար, ինչպես նաև 7007.4 կմ երկարությամբ ընդհանուր օգտագործման ավտոմոբիլային ճանապարհներ, որից՝ միջպետական նշանակության 1686.5 կմ, հանրապետական նշանակության` 3572.1 կմ և մարզային նշանակության` 1748.8 կմ:
Արման Սահակյանը ներկայացրել է նաև տեղեկատվություն պետական գույքի մասնավորեցումից, օտարումից և վարձակալությունից ստացված միջոցների վերաբերյալ: Ըստ այդմ, անցած տարի պետական գույքի մասնավորեցումից ստացված միջոցները կազմել են 178.352.0 հազ. ՀՀ դրամ, որից ՀՀ պետական բյուջե է փոխանցվել 144.150.0 հազ. ՀՀ դրամ, իսկ համապատասխան համայնքային բյուջեներ՝ 34.202.0 հազ. ՀՀ դրամ: 2014 թ. պետական գույքի օտարումից ստացված մուտքերն ունեն հետևյալ տեսքը. գույքի օտարումից ստացված միջոցները կազմել են 1.665.604.0 հազ. ՀՀ դրամ, որից ՀՀ պետական բյուջե է փոխանցվել 1.488.783.0 հազ. ՀՀ դրամ, իսկ համապատասխան համայնքային բյուջեներ՝ 176.821.0 հազ. ՀՀ դրամ: Վարչության կողմից կնքված ոչ բնակելի տարածքների վարձակալության պայմանագրերի հիման վրա 2014 թվականին ՀՀ պետական բյուջե փաստացի մուտքագրվել է 277.546.8 հազ. ՀՀ դրամ՝ նախատեսված 249.000.0 հազ. ՀՀ դրամի փոխարեն: ՀՀ պետական սեփականություն հանդիսացող շենքերի և շինությունների տանիքներին ու ձեղնահարկերում կապի սարքավորումների տեղակայման և սպասարկման վարձակալության պայմանագրերի հիման վրա 2014 թ. փաստացի մուտքագրվել է 4.414.4 հազ. ՀՀ դրամ, որից ՀՀ պետական բյուջե է փոխանցվել 937.8 հազ. ՀՀ դրամ, իսկ համապատասխան ՊՈԱԿ-ների բյուջեներ՝ 3.476.6 հազ. ՀՀ դրամ: Պետական սեփականություն համարվող հողերի կադաստրային արժեքի վճարումից մուտքերը կազմել են 57.465.0 հազ. ՀՀ դրամ: Վերը նշված հոդվածներով պետական բյուջեի մուտքերը կազմել են 1.968.882.6 հազ. ՀՀ դրամ, համայնքային բյուջեներ է փոխանցվել 211.023.0 հազ. ՀՀ դրամ:
Պետգույքի վարչության պետը նշել է, որ հաշվետու տարում մասնավորեցման և օտարման պայմանագրերով պարտավորություններ է ստանձնել 25 գնորդ, որոնց կողմից ստանձնած ներդրումային պարտավորությունները կազմել են 10 757 050 հազար ՀՀ դրամ և 4 270 հազար ԱՄՆ դոլար, իսկ սոցիալական երաշխիքների ապահովման մասով նախատեսվել է ապահովել 47 աշխատատեղ: Վարչության կողմից կատարված ուսումնասիրությունների արդյունքներով՝ 2014 թ. ընթացքում պայմանագրային պարտավորությունները կատարվել են 12 գնորդի կողմից, որոնց ներդրումները կազմել են 434 859 737 ՀՀ դրամ և 3 083 932 ԱՄՆ դոլար, իսկ սոցիալական երաշխիքների ապահովման մասով՝ ստեղծվել է 28 աշխատատեղ): Հաշվետու ժամանակաշրջանում նախատեսված պայմանագրային պարտավորությունները չեն կատարվել (կամ թերակատարվել են) 4 գնորդի կողմից, որոնց չկատարած ներդրումները կազմել են 63.5 մլն ՀՀ դրամ:
Արման Սահակյանը հայտնել է, որ ճշգրտվել է մինչև 50 տոկոս պետական բաժնեմաս ունեցող ընկերությունների ցանկը, իրականացվել է դրանց արտադրական հնարավորությունների և գործունեության հեռանկարների վերլուծություն, և հաշվի առնելով համապատասխան պետական կառավարման լիազորված մարմինների դիրքորոշումը, ներկայացվել են մի շարք առաջարկություններ, այդ թվում՝ մշակվել և ՀՀ կառավարության քննարկմանն է ներկայացվել «Արաբկիր» բժշկական համալիր-երեխաների և դեռահասների առողջության ինստիտուտ» ՍՊԸ-ում և «Երևանի Անանիա Շիրակացու անվան ճեմարան» կրթահամալիր» ՓԲԸ-ում պետական բաժնեմասի կառավարման՝ պետության կողմից լիազորված ներկայացուցիչներին վերաբերող ընթացակարգերը կիրառելու մասին» ՀՀ կառավարության որոշման նախագիծը: Նշված երկու ընկերությունների պետական բաժնեմասի արդյունավետ տնօրինման վերաբերյալ առաջարկություններ ստանալու նպատակով դիմվել է ՀՀ առողջապահության և ՀՀ կրթության և գիտության նախարարություններ:
Վարչապետ Հովիկ Աբրահամյանը, ամփոփելով պետական կույքի կառավարման վարչության հաշվետվությունը, անդրադարձել է 2015 թ. անելիքներին, գերակա խնդիրներին և դրանց կատարման ընթացքին: Կառավարության ղեկավարը պետգույքի կառավարման վարչությանը հանձնարարել է ուշադրության կենտրոնում պահել նաև անավարտ շենք-շինությունների խնդիրը և լուծում գտնել դրանք ավարտին հասցնելու համար:
