Ի՞նչ գործողություններ են իրականացնելու իշխանությունները «Հիմնադիր խորհրդարանի» քայլերը «կանխարգելելու» համար

ԱԺ ՀՀԿ խմբակցության պատգամավոր Վահրամ Բաղդասարյանն իր հարցազրույցներից մեկում, անդրադառնալով «Հիմնադիր խորհրդարանի»` ապրիլի 24-ից սկսվող շուրջօրյա հանրահավաքներին, ասել էր, որ չի կարելի հանդուրժել այս ամենը. «Կարծում եմ, ժամանակն է կանխարգելիչ միջոցներ ձեռնարկել, թույլ չտալ, որ իրենց հայ ժողովրդի զավակ, քաղաքական գործիչ հորջորջող մի խումբ արկածախնդիրներ ստվեր գցեն Ցեղասպանության հարյուրերորդ տարելիցին նվիրված միջոցառումների վրա։ Սա այն դեպքն է, երբ հանդուրժողականությունն արդարացված չէ»:

ԱԺ ՀՀԿ խմբակցության պատգամավոր Լեռնիկ Ալեքսանյանից հետաքրքրվեցինք` ի՞նչ է նկատի ունեցել Վ. Բաղդասարյանը` ասելով` «կանխարգելիչ միջոցներ», և ի՞նչ կարելի է ակնկալել իշխանությունների գործողություններից այս առումով։ Ի պատասխան մեր հարցին` ՀՀԿ-ական պատգամավորն ասաց, որ հստակ չի կարող ասել, թե ինչ է նկատի ունեցել Վ. Բաղդասարյանը, բայց կարծում է, որ այն, ինչ պետության անվտանգությունը, Ցեղասպանության տարելիցի հետ կապած միջոցառումները վտանգում է, դրանց հետ կապված, իրոք, պետք է լինեն կանխարգելիչ միջոցներ։

Ըստ նրա` դրանք կարող են լինել հրապարակային բացատրություններ` մամուլով, որ հասարակությունն ինքը կանխարգելի և չգնա. «Ես կարծում եմ` պարոն Բաղդասարյանը դա է նկատի ունեցել, որ պետությունը, իր ունեցած սահմանադրական միջոցներով, կանխարգելի այն, ինչ վտանգում է պետությանը, հասարակությանը։ Խոսքն այդ միջոցների մասին է, և պետությունը պարտավոր է դա անել»։ Հարցին` եթե իրենք խաղաղ հավաք անցկացնեն, չի՞ կարելի ակնկալել, որ կլինեն ինչ-որ բախումներ, բռնություններ, Լ. Ալեքսանյանը պատասխանեց, որ շատ պայմանական է խաղաղ հավաք անելու հասկացողությունը. «Դրա համար ես շեշտեցի` առաջինը` բացատրել հասարակությանը։ Շատ խաղաղ հավաքները կարող են 1 ժամում վերաճել ամենաագրեսիվ հավաքների»։

Լ. Ալեքսանյանը նկատեց, որ եթե հավաքվում է հասարակություն, հեշտ է հասարակության էմոցիաներն ուղղորդել նույնիսկ այն ուղղությամբ, որի համար ինքը չի եկել այդ հավաքին։

Հարցին` իսկ Ոստիկանության կողմից չե՞ք բացառում այդ սադրիչ գործողությունները, Լ. Ալեքսանյանը պատասխանեց, որ ինքը որևէ տիպի ուժային գործողության կողմնակից չէ, ընդհակառակը` դեմ է դրանց։ Մեր ճշտող հարցին` բայց չեք կարող բացառել, չէ՞ որ ոստիկաններն էլ կարող են հրահրել մարդկանց, ՀՀԿ-ական պատգամավորն այսպես պատասխանեց. «Ես, համենայն դեպս, գիտեմ, որ իշխանությունները (գոնե բարձրագույն իշխանությունները` նախագահը, վարչապետը) ոստիկանապետին հանձնարարություն են տալիս` զերծ մնալ, որովհետև դուք էլ եք հասկանում այսօր, որ դա պետք չէ ո՛չ երկրի նախագահին, ո՛չ մեր իշխանություններին կամ որևէ մեկին։ Ինչքան հնարավոր է` պետք է զերծ մնալ այդ տիպի բաներից, և կան հատուկ հանձարարականներ»։

ԱԺ ՀՅԴ խմբակցության պատգամավոր Արծվիկ Մինասյանն էլ մեզ հետ զրույցում ասաց, որ կանխարգելիչ գործողությունների ներքո պետք է այս դեպքում հասկանալ բացատրական աշխատանքները, որ «չի կարելի թույլ տալ, որ Ցեղասպանության 100-ամյա միջոցառումների այս թեժ շրջանում, երբ թուրքերը, ադրբեջանցիները և բազմաթիվ այլ հակահայ տրամադրված պետություններ ու գործիչներ փորձում են Հայաստանի ներսում տեսնել իսկապես խժդժություններ, անմիաբանություն, օգտվեն այս իրավիճակից». «Լուրջ բացատրական, համոզմունքի աշխատանք պետք է տարվի այս ուղղությամբ»։

ԱԺ ՀՅԴ խմբակցության ղեկավար Արմեն Ռուստամյանը` պատասխանելով հարցին` ինչպե՞ս եք վերաբերվում «Հիմնադիր խորհրդարանի»` ապրիլի 24-ին շուրջօրյա հանրահավաքներ անելու և ռեժիմի դեմ պայքարելու կոչին` ասել էր. «Մենք դեմ ենք քաղաքական պայքարը կապել ապրիլի 24-ի հետ։ Սա այն քայլն է, որ ուզում են անել մեր թշնամիները, մեր չուզողները։ Կարելի է ապրիլի 24-ի ամբողջ միջոցառումների շարքը հարամել։ Մեզ համար բացարձակապես անհասկանալի են մոտիվները, ինչպե՞ս կարելի է այդ օրվա խորհուրդը ոտնահարել»։

Մենք Ա. Մինասյանից հետաքրքրվեցինք` ինչ-որ տեղեկություններ ունե՞ն իրենք նման գործողությունների մասին, որ նման մտավախություն են հայտնում, քանի որ «Հիմնադիր խորհրդարանի» անդամներն ասում են, որ խաղաղ հավաք է լինելու։ Ա. Մինասյանը պարզաբանեց, որ Արմեն Ռուստամյանի ասածից հետևություն պետք է անեն բոլոր նրանք, որոնք որոշել են հավաքվել, քանի որ նրանցից շատերն ի վիճակի չեն լինելու սադրանքները բացառել. «Իսկ այդպիսի հավաքների ժամանակ սադրիչներ միշտ էլ գտնվում են և կարող են հարամ անել ոչ միայն այդ հավաքի իմաստը, նպատակը, այլ նաև անհամահունչ Հայոց ցեղասպանության տարելիցի օրվան` այդ ամենը կարող է բերել շատ ավելի վատ հետեևանքների։ Արմեն Ռուստամյանը սա է ասել»։

«Հիմնադիր խորհրդարանի» նախագահի տեղակալ Վարուժան Ավետիսյանից հետաքրքրվեցինք, թե ի՞նչ կարելի է սպասել առաջիկայում` հաշվի առնելով նաև ՀՀԿ խմբակցության ղեկավարի հայտարարությունը` կանխարգելիչ միջոցառումների հետ կապված։ Ի պատասխան մեր հարցին` նա ասաց, որ անգամ, եթե Ցեղասպանության 100-ամյակի միջոցառումները կազմակերպվում են այսօրվա «հանցավոր ռեժիմի» կողմից, իրենք դրանց խանգարելու, խոչընդոտելու որևէ քայլ չեն կատարի. «Ինչպես գիտեք, մեր հավաքը նախատեսված է Էրեբունի թանգարանի մոտ, այնպես որ, մենք ֆիզիկապես էլ չենք առնչվում դրա հետ»։

Հարցին` ըստ Ձեզ` ի՞նչ կանխարգելիչ միջոցների մասին է խոսքը, ի՞նչ են անելու իշխանությունները, Վ. Ավետիսյանը պատասխանեց, որ ինքը չի կարող ասել, թե «հանցագործների» մոտ ինչ մտքեր կարող են հղանալ, և նրանք ինչ ծրագրեր կարող են կազմել. «Ամեն ինչ էլ իրենցից սպասելի է, արյունոտ ռեժիմ է»։

«168 ԺԱՄ»