Դունյա Միյատովիչը դատապարտել է Ադրբեջանում Խադիջա Իսմայլովային կալանավորելը
Ադրբեջանական Turan լրատվական գործակալության փոխանցմամբ` ԵԱՀԿ-ի` ԶԼՄ-ների ազատության հարցերով ներկայացուցիչ Դունյա Միյատովիչը երեկ Բազելում վճռականորեն դատապարտել է Ադրբեջանում լրագրող Խադիջա Իսմայլովային կալանավորելը.
«Իսմայլովային կալանավորելը ոչ այլ ինչ է, եթե ոչ կազմակերպված ահաբեկում, ինչն էլ իր հերթին հանդիսանում է շարունակվող այն կամպանիայի մի մասը, որն ուղղված է ազատ ու քննադատական ձայները ճնշելուն»:
Միյատովիչն ընդգծել է, որ Իսմայլովային կալանավորելը տեղի ունեցավ այն բանից հետո, ինչ կալանավորվեցին ու դատապարտվեցին մի շարք լրագրողներ, բլոգերներ ու իրավապաշտպաններ: Միյատովիչն Ադրբեջանի իշխանություններին կոչ է արել վերջ դնել այդ պրակտիկային:
Ադրբեջանական դատարանը երեկ որոշել է երկու ամսով նախնական կալանքի տակ առնել Խադիջա Իսմայլովային: Իսմայլովան մեղադրվում է ինքնասպանություն հրահրելու մեջ: Եթե լրագրողուհուն մեղավոր ճանաչեն դրանում, ապա նրան սպառնում է մինչև 7 տարվա ազատազրկում:
