Պորոշենկոն ու Մերկելը քննարկել են Դոնբասում հրադադարի ռեժիմի խախտումների հարցը
Ուկրաինական UNIAN լրատվական գործակալության փոխանցմամբ` Ուկրաինայի նախագահ Պյոտր Պորոշենկոն հեռախոսազրույց է ունեցել Գերմանիայի կանցլեր Անգելա Մերկելի հետ, որի ժամանակ քննարկել է Դոնբասում հրադադարի ռեժիմի խախտումների հարցը:
Այս մասին հայտնել է Ուկրաինայի նախագահի մամլո ծառայությունը: Վերջինիս հաղորդմամբ` Պորոշենկոն ու Մերկելը մտահոգություն են հայտնել հրադադարի ռեժիմի խախտումների կապակցությամբ: Բացի այդ, նրանք պայմանավորվել են շարունակել հետագա ջանքերը իրավիճակի խաղաղ կարգավորման ուղղությամբ:
Այդ համատեքստում Գերմանիայի կանցլերն աջակցել է Ուկրաինայի Գերագույն ռադայի կողմից Դոնեցկի ու Լուգանսկի մարզերի մի շարք շրջանների մասին հատուկ կարգավիճակ տրամադրելու և համաներման մասին օրենքերին: Պորոշենկոն ու Մերկելն անդրադարձել են նաև Բրյուսելի եռակողմ բանակցությունները:
