ԱՄՆ-ը բանակային ստորաբաժանումներ է ուղարկում Լեհաստան ու Բալթյան երկրներ
Բրիտանական Reuters լրատվական գործակալության փոխանցմամբ՝ ԱՄՆ-ը մոտ 600 զինծառայող է ուղարկում Լեհաստան ու մերձբալթյան երեք երկրներ՝ հետևակային մանևրներ իրականացնելու համար:
Այս մասին հայտնել է Պենտագոնը, ըստ որի՝ տվյալ քայլը կոչված է Ռուսաստանի կողմից Ղրիմի բռնազավթումից հետո ՆԱՏՕ-ի գծով ԱՄՆ-ի դաշնակիցներին հանգստացնելուն:
Պենտագոնի հաղորդմամբ՝ 150 հոգուց բաղկացած խմբերն ուղարկվելու են Լեհաստան, Էստոնիա, Լիտվա ու Լատվիա՝ մասնակցելու համար մեկամսյա վարժանքներին: Ամերիկյան զորախմբերից մեկը Լեհաստան կժամանի այսօր, իսկ մնացյալ զորախմբերը մերձբալթյան երկրներ կժամանեն մինչև ապրիլի 28-ը:
Միևնույն ժամանակ Պենտագոնը հայտնել է, որ «Թեյլոր» ֆրեգատը վերադառնում է Սև ծով, որտեղ գտնվող «Դոնալդ Քուք» հրթիռակիր էսկադրոնային ականակիրը պատրաստվում է լքել նրա ջրատարածությունը:
