Արագաչափերն անվտանգությա՞ն, թե՞ շահույթ ստանալու համար են տեղադրվում
tesankyun.am-ը գրում է. Տավուշի մարզի Նոյեմբերյանի տարածաշրջանում վերջերս մի քանի արագաչափեր են տեղադրվել: Դրանք առաջացրել են վարորդների դժգոհությունը, նրանք այդ կապակցությամբ բողոքել են կայքին:
Արագաչափերից մեկը տեղադրված է Նոյեմբերյան քաղաքից մոտ 8 կմ հեռավորության վրա գտնվող Ջուջեւան գյուղի մուտքի մոտ, Նոյեմբերյան-Իջեւան ավտոճանապարհին: Ջուջեւանի գյուղապետ Ժորա Չիլինգարյանը մեզ ասել է, որ ինքը կողմ է Ջուջեւանում արագաչափի տեղադրմանը, քանզի որոշ վարորդներ գյուղի տարածքում գերազանցում են բնակավայրում թույլատրված առավելագույն արագության` 60կիլոմետր/ժամի սահմանը:
Նոյեմբերյանի տարածաշրջանի բազմաթիվ վարորդներ դեմ չլինելով Ջուջեւանում արագաչափի տեղադրմանը, դեմ են գյուղի ծայրին դրա տեղակայմանը, քանի որ այդ արագաչափը չի լուծում բնակավայրի տարածքում երթեւեկության անվտանգությանը նպաստելու խնդիր:
Այդ արագաչափի կողքով անցնելով` այնուհետեւ վարորդները Ջուջեւանի տարածքում մեծ արագությամբ են ընթանում: Վարորդներն ասում են, որ ճիշտ կլիներ արագաչափը տեղադրել գյուղապետարանի եւ դպրոցի ճանապարհի խաչմերուկում կամ էլ գյուղի ավտոկանգառի հարեւանությամբ:
Այդ տեղերում մարդկային հոսքը մեծ է ,վթարների հավանականությունը` նույնպես: Վարորդները նաեւ ասում են, որ գյուղի ծայրին, թեքության վրա արագաչափի տեղադրումը ձմռան պայմաններում խնդիրներ է առաջացնելու, քանի որ ցածր արագությամբ հնարավոր չի լինելու հաղթահարելու Ջուջեւանի բարձունքը:
Նոյեմբերյանցի վարորդները հայտնում են, որ միջազգային «Նավիգատոր» արբանյակային ծրագրով Ջուջեւանում արագաչափի տեղը նշված է գյուղի ավտոկանգառի հարեւանությամբ:
Վարորդները կարծում են, որ ի սկզբանե հենց այդտեղ էլ նախատեսված է եղել տեղադրել արագաչափը,սակայն տեղը փոխվել է, որպեսզի այն ավելի շատ խախտումներ արձանագրի, քանզի բարձունքից իջնող կամ այն հաղթահարող մեքենաները կարող են գերազանցել սահմանված արագությունը:
Մանրամասներն` այստեղ
