Այսօր ԱԺ ոչ իշխանական չորս խմբակցությունները նիստ կգումարեն
Այսօր ԱԺ ոչ իշխանական չորս խմբակցությունները` ՀԱԿ, ՀՅԴ, ԲՀԿ, «Ժառանգություն», նիստ կգումարեն: Ենթադրվում է, որ խմբակցությունները կամփոփեն հունվարի 18-ին տեղի ունեցած կուտակային պարտադիր բաղադրիչի դեմ կազմակերպված հանրահավաքն ու կորոշեն «գազային» հայտնի պայմանագրերի առնչությամբ Սահմանադրական դատարան դիմել-չդիմելու հարցը: 168.am-ի թղթակցի հետ զրույցում ԱԺ ԲՀԿ խմբակցության քարտուղար Նաիրա Զոհրաբյանը հաստատեց, որ խմբակցություններն աշխատանքային քննարկում կանցկացնեն` ավելացնելով. «Ես չեմ կարծում, որ տեղին է աշխատանքային քննարկումները մամուլում պարբերաբար հրապարակելը: Երբ մենք այս կամ այն հարցի շուրջ կգանք վերջնական որոշման` անելիքների, քայլերի վերաբերյալ, մամուլին, ինչպես միշտ, կտեղեկացնենք: Մենք ունենք պայմանավորվածություն պարբերաբար հանդիպելու` քաղաքական կոնսուլտացիաների, խորհրդակցությունների համար, և վաղն էլ չորս քաղաքական ուժերի հերթական աշխատանքային խորհրդակցությունը տեղի կունենա` միասնական օրակարգը քննարկելու համար»:
Նշենք, որ ԱԺ ոչ իշխանական չորս ուժերն այս տարի արդեն երրորդ անգամ են հանդիպում փակ դռների հետևում:
