Սիրիայի քիմիական զինանոցի ոչնչացմանը մասնակցելու է 35 մասնավոր ընկերություն
Ամերիկյան Associated Press լրատվական գործակալության փոխանցմամբ՝ Սիրիայի քիմիական զինանոցը ոչնչացնելուն մասնակցելու ցանկություն է հայտնել 35 մասնավոր ընկերություն: Արդեն իսկ ավարտվել է տվյալ ծրագրին մասնակցելու հայտ ներկայացնելու ժամկետը:
Այս մասին հայտնել է Քիմիական զենքն արգելող կազմակերպության անանուն աշխատակիցը: Վերջինս չի մանրամասնել մասնակից ընկերությունների անուններն ու մասնակցության պայմանները: Նա ընդգծել է, որ առավել վտանգավոր նյութերի վերացումն իրականացվելու է անվտանգ վայրում՝ իրենց վերահսկողության ներքո: Ամենայն հավանականությամբ դա տեղի կունենա նավի վրա:
Սիրիայի քիմիական զինանոցի ամբողջական ոչնչացումը նախատեսված է իրականացնել մինչև 2014 թվականի կեսերը: Սիրիայի քիմիական զինանոցը բաղկացած է մոտ 1300 տոննա քիմիական նյութերից, որոնցից մոտ 800 տոննան չեզոքացվելու է մասնավոր ընկերությունների կողմից:
