Խաղատները չեն ուզում գաղթել
Անցած տարի սեպտեմբերին վարչապետ Տիգրան Սարգսյանի մոտ տեղի ունեցած խորհրդակցության ժամանակ խաղասրահների և խաղատների ներկայացուցիչները խնդրել էին նրա աջակցությունը՝ 3 տարի առաջ ընդունված «Շահումով խաղերի և խաղատների մասին» օրենքի փոփոխության հետ կապված: Հիշեցնենք, որ այդ օրինագծի համաձայն, 2013 թ-ի հունվարի 1-ից խաղատուն կամ շահումով խաղ թույլատրվում էր կազմակերպել Ծաղկաձորում, Ջերմուկում և Սևանում, իսկ Երևանի շրջակայքում խաղատուն կարող էր գոյություն ունենալ միայն ՀՀ կառավարության կողմից հավանության արժանացած 40 մլրդ դրամից ավելի ներդրումային ծրագրի դեպքում: Նման ծրագիր իրականացնում էր ԲՀԿ նախագահ Գագիկ Ծառուկյանը, ով այս տարի մայիսին «տաճարախառն» հանդիսությամբ բացեց «Փարավոն» հանգստի, խաղատնային և զվարճանքների կենտրոնը:
Մամուլում բազմաթիվ հրապարակումներ եղան, որ «Փարավոնի» առկայությամբ մնացած՝ արդեն մանր թվացող խաղատներն ու խաղասրահները Երևանի շրջակայքից հեռանալուց հետո ակնհայտ կլինի նոր մենաշնորհատիրոջ առկայությունը: Խոսվում էր նաև, որ դա անցած ընտրական խառը գործընթացներում Սերժ Սարգսյանի ու Գագիկ Ծառուկյանի միջև այսպես ասած փոխզիջումային տարբերակի արդյունք է:
Ինչևէ, օրենքն անցած տարեվերջին փոփոխեցին ու ժամկետը երկարաձգեցին 1 տարով: Այսինքն, մանր ու միջին խաղատներն ու խաղասրահները մայրաքաղաքի շրջակայքում պետք է փակվեն արդեն 4 ամիսից՝ 2014 թ. հունվարի 1-ից: Մինչդեռ, այսօրվա դրությամբ կարծես թե «անդորր է փոթորկից առաջ», ոչինչ չի կատարվում ու ոչ մեկն այս մասին չի խոսում: Խաղային բիզնեսի տերերն էլ չեն շտապում թարմացված օրենքով նախատեսված տարածքներում (Ծաղկաձոր, Ջերմուկ, Սևան, Մեղրի, «Զվարթնոց» օդանավակայան և «Երևան» ազատ տնտեսական գոտի) ներդրումներ անել ու իրենց կառույցները տեղափոխել: Համենայն դեպս, Ջերմուկում և Ծաղկաձորում խաղային նոր բիզնեսների մասին «շորշոփ» չկա:
ՀՀ ֆինանսների նախարարության տեղեկատվության և հասարակայնության հետ կապերի բաժնից ևս 168.am-ին հայտնեցին, որ առայժմ շարժ չի նկատվում և դժվար է ասել, թե խաղատների և խաղասրահների սեփականատերերն իրենց բիզնեսները տեղափոխո՞ւմ են, թե՞ ոչ: Նախարարությունից նշեցին, որ երբ օրենքն ուժի մեջ մտնի, այն ժամանակ էլ իրավիճակը կհստակեցվի:
Սակայն խաղային բիզնեսի ներկայացուցիչների այս հանգստությունը հուշում է, որ շատ հնարավոր է՝ օրենքի գործողության ժամկետը կրկին հետաձգվի: Եթե այն ժամանակ որպես պատճառ նշվել էր ֆինանսատնտեսական ճգնաժամը, ապա հիմա էլ նույն գործոնը դեռ ուժի մեջ է։ Դրան կարելի է հավելել ոչ ֆորմալ պատճառները. ընտրական «ծանրաբեռնված» տարի էր, գործարարներն իրենց գումարներն այլ ուղղությամբ էին ծախսում ու նոր ներդրումների ուժ չունեին: Այնպես որ չի բացառվում, որ մյուս խաղատների մասին օրենքի կիրառման ժամկետը կրկին երկարաձգվի՝ փոշիացնելով Ծառուկյանի մենաշնորհի կայացումը։
