Ադրբեջանի ԱԳՆ-ը սպասում է Իրանի պարզաբանմանը՝ կապված իր քաղաքացիների ձերբակալման հետ
Ադրբեջանական Trend լրատվական գործակալության փոխանցմամբ՝ Բաքուն սպասում է իրանական կողմի պարզաբանմանը՝ կապված այդ երկրում Ադրբեջանի քաղաքացիների ձերբակալման հետ:
Այս մասին այսօր հայտարարել է Ադրբեջանի ԱԳՆ-ի պաշտոնական ներկայացուցիչ Էլման Աբդուլաևը. «Իրանական կողմը մեր քաղաքացիներին դեռ միայն մեղադրել է ապօրինի գործողությունների մեջ՝ չմանրամասնելով, թե կոնկրետ ինչում:
Բաքվի համար առաջնահերթ է Ադրբեջանի քաղաքացիներին պահելու պայմանները: Պաշտոնական Բաքուն աշխատում է այն ուղղությամբ, որ Թավրիզում Ադրբեջանի հյուպատոսը կարճ ժամանակում հանդիպի մեր քաղաքացիներին՝ առաջին հերթին պարզելու համար, թե ինչ պայմաններում են պահում նրանց»:
Ադրբեջանի ԳԱԱ-ի գիտաշխատող Խալիդա Խալիդը և նրա օգնական Շամխալ Հուսեյնովը Թավրիզում ձերբակալվել են ապրիլի 30-ին: Դրա հետ կապված՝ Ադրբեջանի ԱԳՆ-ը երկու անգամ բողոքի նոտա է հղել իրանական կողմին:
