Պռոշյանի գյուղապետ Հրաչ Մուրադյանի սպանությունը կատարելու կասկածանքով կան ձերբակալվածներ. Ոստիկանություն
Ապրիլի 2-ին Կոտայքի մարզի Պռոշյան գյուղում կատարված նույն գյուղի գյուղապետ Հրաչ Մուրադյանի սպանության փաստով հարուցված քրեական գործի նախաքննության շրջանակներում հարցաքննվել են մի քանի տասնյակ անձինք, կատարվել են քննչական համալիր փորձարարություններ և դեպքի վայրի լրացուցիչ զննություն:
Ոստիկանության տարբեր ստորաբաժանումների փոխգործակցված միջոցառումների արդյունքում՝ հանցագործությունը կատարելու կասկածանքով կան ձերբակալվածներ:
Ձեռնարկվում են անհրաժեշտ օպերատիվ-հետախուզական և քննչական միջոցառումներ սպանության դեպքի բոլոր հանգամանքները պարզելու նպատակով:
Քրեական գործի նախաքննությունը շարունակվում է: Այս տեղեկատվությունը տրամադրում է ՀՀ Ոստիկանության մամուլի ծառայությունը։
Ավելացնենք, որ մի շարք ԶԼՄ-ներ, հղում անելով իրենց աղբյուրներին, նշում են, որ ձերբակալվածների թվում են համայնքապետի ընտրությունների ժամանակ դաշնակցական Հ. Մուրադյանի հիմնական մրցակից, ՀՀԿ-ական Արթուր Մուրադյանի թիմակիցները։
