Ջորջ Բուշն ԱՄՆ-ին կոչ է արել «չմոռանալ սեպտեմբերի 11-ի գլխավոր դասը»
ԱՄՆ նախկին նախագահ Ջորջ Բուշը հայտարարել է, որ ամերիկացիները չպետք է մոռանան 2001 թվականի սեպտեմբերի 11-ի ահաբեկչական հարձակումների դասերը, մասնավորապես այն, որ արտասահմանում տեղի ունեցող իրադարձություններն անմիջականորեն ազդում են երկրի անվտանգության վրա, հայտնում է CBS News-ը։
Բուշը չորեքշաբթի ելույթ է ունեցել Դալասում գտնվող իր նախագահական գրադարանում՝ նախկին պետքարտուղար և ազգային անվտանգության հարցերով խորհրդական Կոնդոլիզա Ռայսի հետ միասին՝ հիշելով 25 տարվա վաղեմության իրադարձությունները։
«Մեր երկիրը ժամանակ առ ժամանակ անցնում է մեկուսացման շրջանների միջով, երբ վերաբերմունքն այսպիսին է՝ մենք տանը չափազանց շատ խնդիրներ ունենք, ուրեմն ո՞ւմ է հետաքրքրում, թե ինչ է տեղի ունենում արտասահմանում»,- ասել է Բուշը։ Նրա կարծիքով՝ նման դիրքորոշումը նշանակում է, որ ամերիկացիները ուշադրություն չեն դարձնում սեպտեմբերի 11-ի գլխավոր դասին. այլ երկրներում տեղի ունեցողը նշանակություն ունի ԱՄՆ ազգային անվտանգության համար։
Բուշը նաև կոչ է արել Միացյալ Նահանգներին աջակցել այն մարդկանց, որոնք պայքարում են բռնապետության դեմ։ Միաժամանակ, նշել է նա, նման աջակցությունը պարտադիր չէ, որ նշանակի ամերիկյան զորքերի ուղարկում։
Նախկին նախագահը հիշել է նաև Աֆղանստանը, որտեղ ԱՄՆ-ը ռազմական գործողություն սկսեց սեպտեմբերի 11-ի ահաբեկչություններից հետո։ Հետագայում ամերիկյան վարչակազմն աջակցեց երկրում ժողովրդավարական կառավարության ստեղծմանը՝ «Թալիբան» շարժման իշխանության տարիների բազմամյա բռնաճնշումներից հետո։ Սակայն պատերազմը շարունակվեց 20 տարի և դարձավ ԱՄՆ-ի ամենաերկարատև ռազմական հակամարտությունը՝ ավարտվելով 2021 թվականին ամերիկյան զորքերի դուրսբերմամբ և «Թալիբանի» իշխանության վերադարձով։
Բուշը չի համաձայնել այն տեսակետի հետ, ըստ որի Աֆղանստանի բնակիչները իբր չեն հասկանում ազատության և բռնապետության պայմաններում կյանքի տարբերությունը։ Նա հիշեցրել է աֆղան աղջիկների մասին, որոնք առաջին անգամ դպրոց գնալու հնարավորություն ստացան, ինչպես նաև այն կանանց, որոնք դարձան բժիշկներ և դասախոսներ։ Ըստ Բուշի՝ «Թալիբանի» վերադարձից հետո աֆղան աղջիկները զրկվեցին իրենց ներուժը իրացնելու հնարավորությունից։
Բուշը նաև պատմել է սեպտեմբերի 11-ի հարձակումներից հետո առաջին ժամերի մասին։ Այդ պահին նա գտնվում էր տարրական դպրոցում, երբ իր աշխատակազմի ղեկավար Էնդի Քարդը հայտնել էր հարձակման մասին։ «Այդ պահին ես դարձա պատերազմի ժամանակների նախագահ»,- ասել է Բուշը։
Ռայսն իր հերթին հիշել է, որ ահաբեկիչների կողմից ինքնաթիռների առևանգումից հետո յուրաքանչյուր օդանավ ընկալվում էր որպես հնարավոր հրթիռ։ Իշխանությունները բոլոր ինքնաթիռներին կարգադրել էին վայրէջք կատարել, իսկ Բուշն ու Ռայսը մի քանի րոպե վախենում էին, որ ամերիկյան զինվորականները կարող էին խոցել առևանգված 93-րդ չվերթը։ Իրականում ինքնաթիռը կործանվել էր Փենսիլվանիայում այն բանից հետո, երբ ուղևորները փորձել էին խանգարել ահաբեկիչներին և զավթել վերահսկողությունը։
Բուշը պատմել է նաև, որ ահաբեկչություններից հետո մտահոգված էր ամերիկյան հասարակության միասնությամբ։ Նա այցելել է մզկիթ, քանի որ անհանգստացած էր մահմեդականների և այլ մարդկանց վրա հարձակումների մասին հաղորդումներից, որոնց հետապնդում էին արտաքին տեսքի կամ ծագման պատճառով։ Նախկին նախագահի համոզմամբ՝ ահաբեկչության դեմ պայքարը չպետք է հանգեցներ դավանանքի ազատությունից հրաժարվելուն։
«Ես չէի ուզում, որ մենք կորցնենք մեր հոգին»,- ասել է Բուշը՝ հիշելով հարձակումներից հետո առաջին շաբաթները։
