Պռոշյանի գյուղապետարանի դիմաց հայտնաբերվել է գյուղապետի դին
Ոստիկանության Կոտայքի մարզային վարչություն ահազանգ է ստացվել, որ Կոտայքի մարզի Պռոշյանի գյուղապետարանի դիմաց տղամարդու դի կա: Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել Ոստիկանության քրեական հետախուզության գլխավոր վարչության պետ Աշոտ Կարապետյանը, նույն վարչության պետի տեղակալ Սամվել Ասատրյանը, նույն վարչության 2-րդ վարչության պետ Ալիկ Մարգարյանը, ոստիկանության և նույն վարչության Արագ հակազդման բաժնի մեծ թվով աշխատակիցներ, ինչպես նաև Ոստիկանության Կոտայքի մարզային վարչության աշխատակիցները: Այս մասին հաղորդում է shamshyan.com կայքը:
Ֆոտոլրագրողը հայտնում է, որ գյուղապետարանի մոտ հայտնաբերվել է գյուղապետ Հրաչ Մուրադյանի դին:
Հավաքվածները ֆոտոլրագրողի հետ զրույցում պատմել են, որ գյուղապետին սպանել են, սակայն, մեկ այլ վարկածով էլ նա հանկարծամահ է եղել, ինչը կպարզվի քիչ ուշ: Արդեն դեպքի վայր են ժամանում Ոստիկանության քննչական գլխավոր վարչության Կոտայքի մարզի քննչական բաժնի քննիչները և դատաբժիշկը:
