ՄԱԿ ԳԱ-ում քվեարկության կդրվի աշխարհում զենքի ապօրինի շրջանառման կանխման մասին պայմանագիրը
Ռուսական РИА Новости լրատվական գործակալության փոխանցմամբ՝ ակնկալվում է, որ ՄԱԿ ԳԱ-ն կընդունի առաջին միջազգային պայմանագիրը՝ ուղղված աշխարհում զենքի ապօրինի շրջանառման կանխմանը: Դրա համար պահանջվում է 193 երկրի ներկայացուցիչների մեծամասնության աջակցությունը:
ՄԱԿ ԳԱ-ում այս քվեարկության անցկացումը պայմանավորված է նրանով, որ նախորդ շաբաթ ՄԱԿ-ի միջազգային կոնֆերանսում չհաջողվեց կոնսենսուսի գալ տվյալ պայմանագրի տեքստի շուրջ, քանի որ Իրանը, Սիրիան ու Հյուսիսային Կորեան այն համարեցին որպես անհավասարակշիռ՝ գտնելով, որ դա զենքի հիմնական արտահանողներին թույլ է տալիս թելադրել իրենց պայմանները:
Զենքի առևտրի շուրջ պայմանագրի կնքման մասին գաղափարն արտահայտվել է դեռևս 1995 թվականին՝ նոբելյան մրցանակակիրների խմբի կողմից: Միայն 2009 թվականին ՄԱԿ ԳԱ-ն որոշեց սկսել նախապատրաստվել կոնֆերանսի գումարմանը՝ պայմանագրի տեքստը կազմելու համար:
