Թրաֆիքինգ. աղջիկներ են տարել Թուրքիա

Շիրակի մարզի ընդհանուր իրավասության դատարանն արդեն մեկ ամիս է`դատավոր Էդուարդ Մանուկյանի նախագահությամբ,  քննում է քրեական գործ, ըստ որի` ամբաստանյալ երկու կանայք կավատությամբ են զբաղվել: Ըստ մեղադրանքի՝ նրանք այլ կանանց տարել են Թուրքիա՝ աշխատելու առաջարկով և ստիպել են զբաղվել մարմնավաճառությամբ: Քրեական գործը Գյումրիի բնակիչներ Սուսաննա Մարտիրոսյանի և Հրանուշ Մովսիսյանի նկատմամբ հարուցվել է Գյումրիի բնակչուհի Գայանե Միրզախանյանի դստեր պահանջով:

Տուժողը, սակայն, դատարան չի ներկայանում: Նրա փոխարեն դատարանում դստեր շահերը ներկայացնում է նրա մայրը: «Ես թույլ չեմ տա իմ աղջկան, որ գա դատարան, ես չեմ թողնի, որ դարձյալ հանդիպում լինի սրանց բանդայի հետ, նա դրան չի դիմանա, առանց այն էլ շատ է տուժել: Նրա անունն էլ մի գրեք: Նա արդեն ցուցմունք տվել է նախաքննական մարմիններին և ամեն ինչ շատ պարզ է»,- ԳԱԼԱ-ին փոխանցել է տուժողի մայրը՝ Գայանե Միրզախանյանը:

Տիկին Գայանեի  փոխանցմամբ՝ դստերը  տարել են Թուրքիա՝ խոստանալով, որ երեխայի է խնամելու, սակայն Տրապիզոն քաղաքում ստիպել են չորս ամիս շարունակ զբաղվել մարմնավաճառությամբ՝ նախապես նրանից խլելով բոլոր փաստաթղթերը.

«Համոզողը Հրանուշն էր, բայց գլխավոր կավատը՝ Սուսանը, հենց Թուրքիայում է եղել՝ Տրապիզոնում: Ես եկա, որ նրան էլ տեսնեմ, թքեմ երեսին, ասեմ` էդ սպիտակ մազերիցդ չես ամաչում, այ անբարոյական»:

Տիկնոջ պատմելով՝ դստերը աշխատանք են առաջարկել Ստամբուլում ու խաբելով տարել Տրապիզոն, ստիպել «Իզմիր» հյուրանոցում զբաղվել մարմնավաճառությամբ: «Եկավ Հայկուշը մեր տուն, պատմեց, թե ինքը ընդեղ՝ Թուրքիայում՝ Ստամբուլ քաղաքում հայի երեխա է մեծացնում ու լավ էլ վճարում են իրան: Ասաց՝ մի երեխա էլ կա, ծնողները հայ են, աշխատում են, տանը հայ աշխատող են ուզում»,- պատմել է թրաֆիքինգի ենթարկված կնոջ մայրը:

Ըստ նրա՝ երկար համոզելուց հետո է ինքը համաձայնել աղջկան թույլ տալ, որ մեկնի Թուրքիա: Ի դեպ, իր դուստրն էլ փոքր երեխա ունի: «Իրա երեխեն էդ ժամանակ վեց ամսական էր, բայց ասի՝ ես կմեծացնեմ, թող մի քանի ամսով գնա, որ կարողանա եղբոր գերեզմանը կառուցել, ստեղ չենք կարող, աշխատանք չկա, բան չկա: Բայց գնաց ու կորավ երկար ժամանակ»: Հետո մի անգամ Տրապիզոնում գտնվող դուստրը խոսել է մոր հետ, բայց բոլորի ներկայությամբ, և մայրը դստեր ձայնից զգացել է, որ ինչ-որ բան նորմալ չէ: «Սկայպով տեսա, տեսքը լավ էր, կողքը կանգնած էին, կհարցնեի` ինչղ ես, կսեր` լավ եմ մամ, բայց տխուր էր, չհասկցա՝ ինչն էր պատճառը»,- պատմել է Գայանե Միրզախանյանը:

Տուժողը հնարավորություն չի ունեցել ոչ վերադառնալու, ոչ էլ շփվելու գյումրեցի հարազատների հետ: Այնուամենայնիվ, նրան հաջողվել է դիմել թուրքական կառավարությանը եւ խնդրել, որ հետ ուղարկեն. Գայանե Միրզախանյանի դստերը արտաքսել են որպես անօրինական միգրանտ. «Իրա ձեռքը փաստաթուղթ չեն տվել, չեն թողել գա, թանկ շորեր են առել, որ մուշտարիների համար երես ելնելու էղնի: Հետո ըսել են՝ քու շորերիդ փողը ո՞վ պտի փակվի, ստիպել են աշխատել, հետո դիմել է իշխանություններին ու իրան դեպորտ են արել»,- պատմել է մայրը:

Վերադառնալով Հայաստան՝ տուժողը դիմել է իրավապահ մարմիններին, սակայն հիմա հրաժարվում է ներկայանալ դատարան: Նրա մայրը հայտարարում է, որ աղջիկը Օրենբուրգում է եւ խնդրում է գործին ընթացք տալ առանց նրա մասնակցության: Տուժողի մայրը` Գայանե Միրզախանյանը, ԳԱԼԱ-ի հետ զրույցում հայտարարել է, որ բողոքելու է մինչեւ վերջ, որպեսզի իր «աղջկա պատիվը արատավորողները, խաբողները պատժվեն օրենքի ամբողջ խստությամբ»:

Քրիստինա Մկրտչյան