Թյուրիմացություն է, երբ ասում են, թե Առաքելական եկեղեցին հարկ չի վճարում՝ վճարում է. Հայկ Ֆարմանյան
Հայ առաքելական սուրբ եկեղեցին 1 տարում ավելի քան 520 մլն դրամ հարկ է վճարել։ Այսօր ԱԺ–ում իր ելույթի ժամանակ այս մասին ասաց ընդդիմադիր «Ուժեղ Հայաստան» խմբակցության կողմից ֆինանսավարկային և բյուջետային հարցերի մշտական հանձնաժողովի նախագահի թեկնածու առաջադրված Հայկ Ֆարմանյանը։
«Հայ առաքելական սուրբ եկեղեցին հարկ վճարում է։ 2025 թվականի տվյալներով` եկեղեցին ավելի քան 520 մլն դրամի հարկ է վճարել։ Որպեսզի թյուրիմացություններից խուսափենք, ասեմ, որ օրենսդրությամբ սահմանված կարգով հարկերից ազատվում են միայն կրոնական գրականության վաճառքն ու ծիսակատարությունները»,- ասաց Ֆարմանյանը։
Նա միաժամանակ ընդգծեց, որ Հայ առաքելական սուրբ եկեղեցին պետք է փայփայել, քանի որ այն ոչ միայն հավատքի ու կրոնական կենտրոն է, այլև հայապահպան կարևոր ինստիտուտ։
Նշենք, որ ըստ ՊԵԿ–ի տվյալների` 2025 թվականին Հայ առաքելական եկեղեցին ընդհանուր ավելի քան 702 մլն հարկ է վճարել, որից` 506 միլիոնը կազմել է եկամտային հարկը։
