Սեպտեմբերի 2-ին արցախահայերի նախատեսված հանրահավաքը՝ առանց Նիկոլ Փաշինյանի հրաժարականի պահանջի, դառնում է տուն-տունիկ. Արամայիս Աղաբեկյան
Սեպտեմբերի 2-ին՝ Արցախի Հանրապետության անկախության հռչակման օրը, Ազատության հրապարակում արցախահայերն իրականացնելու են հանրահավաք՝ խորհրդանշելու այդ օրը։ Այդ հանրահավաքով արցախահայերը ցանկանում են նաև ցույց տալ, որ չեն հրաժարվում իրենց իրավունքներից և պայքարելու են հանուն ապագայի։
Արցախի Հանրապետության ԱԺ պատգամավոր Արամայիս Աղաբեկյանի խոսքով՝ գուցե իրեն շատերը մեղադրեն, քննադատեն, բայց սեպտեմբերի 2-ի հանրահավաքը՝ առանց ՀՀ իշխանությունների հրաժարականի պահանջը դնելու, առոչինչ է։
«Ինքս առանձնահատուկ սպասելիքներ չունեմ այդ հանրահավաքից, համարում եմ որևէ նշանակություն չունեցող հերթական հանրահավաքներից մեկը, քանի որ, եթե այդ հանրահավաքի նպատակը ՀՀ-ում իշխանափոխությունը չէ, այլ սեպտեմբերի 2-ին նվիրված ինչ-որ միջոցառում կազմակերպելը, ապա այն դառնում է տուն-տունիկի նման մի բան, որը 2021 թվականից սկսած հազար անգամ տեսել ենք։
Կարծում եմ՝ Նիկոլ Փաշինյանի դեմ իրատեսական գործողություն իրականացնելը եղել է իմպիչմենտի գործընթացը, որը պետք է արվեր ու չի արվել։ Հիմա այն ամենը, ինչ դուք տեսնում եք, ավելի շատ նման է նախընտրական նախերգանքի, ինչ-որ գործընթացների, քան թե քաղաքական բուն գործընթացների»,- 168.am-ի հետ զրույցում նշեց Արամայիս Աղաբեկյանը։
Ըստ պատգամավորի, որքան Նիկոլ Փաշինյանը մնա իշխանության, էական չէ, թե քանի հանրահավաք կանցկացվի, և տարբերություն չկա, թե քանի մարդ կհավաքվի՝ արդյունք չի լինելու։
Նա վստահ է՝ եթե այդ հանրահավաքներում չեն իրականացվելու անհնազանդության այնպիսի ակցիաներ, որոնք իշխանություններին զրկելու են բնականոն գործողություններից, իհարկե, օրենքով ու ժողովրդավարական միջոցներով, ապա որևէ դրական ակնկալիք չպետք է ունենալ։
Դիտարկմանը՝ ՔՊ-ական տարբեր պատգամավորներ, իշխանության այլ ներկայացուցիչներ մշտապես հայտարարում են, թե Նիկոլ Փաշինյանին արցախահայերը չեն ընտրել, որ նրա հրաժարականն էլ պահանջեն, Արամայիս Աղաբեկյանը հակադարձեց՝ ճիշտ է, Նիկոլ Փաշինյանին արցախահայերը չեն ընտրել, հետևաբար՝ նա ի՞նչ իրավունքով է Արցախի ու արցախահայերի վերաբերյալ նման որոշումներ կայացրել։
«Արցախի քաղաքացիները, որոնք հիմա գտնվում են ՀՀ-ում, լիիրավ բոլոր իրավունքներն ունեն պահանջելու Նիկոլ Փաշինյանի հրաժարականը, քանի որ նա՛ է արցախահայերի ճակատագրային հարցերի վերաբերյալ որոշումներ կայացրել, ումի՞ց գնան պահանջեն։ Փաստաթղթերի տակ նա է ստորագրել, նոյեմբերի 9-ի եռակողմ փաստաթղթի տակ ինքն է ստորագրել, այլ մարդ չի ստորագրել, որ արցախահայերը գնան, ասեն՝ ինչպե՞ս եղավ։ Արցախահայերն առանձին պահանջելու հարց չունեն՝ կա հայկական հարց, որի մի մասն էլ Արցախն է, արցախցիները, ինչպես սյունեցիները, տավուշեցիները՝ իրենց խոսքի ու գործի տերն են»,- շեշտեց Արցախի ԱԺ պատգամավորը։
Նա նաև ընդգծեց՝ նույնիսկ այս իրավիճակում, եթե Հայաստանում իշխանությունը փոխվի, հնարավոր է անդրադառնալ Արցախի հարցին ու ակնկալել դրական արդյունք։
«Եթե նույնիսկ Ադրբեջանի դիրքից ենք նայում իրավիճակին, իրենք ավելի վատ պայմաններում են եղել 1994 թվականի ռազմական պարտությունից հետո, բայց չեն հրաժարվել իրենց շահերից ու իրավունքներից։ Նիկոլ Փաշինյանը մտածում է, որ ամեն անգամ ցանկացած վտանգի առաջ իր ձեռքերը բարձրացնելով՝ վերջում իր իշխանությունը պահելու է։
Նա ոչ թե ՀՀ-ի հարցերն է լուծում, այլ իր իշխանության, դրա համար բոլորին իրենց «փայը» տալիս է՝ ամերիկացիներին, ռուսներին, իրանցիներին, և այդ բոլորը՝ հայ ազգի հաշվին»,- նշեց Արամայիս Աղաբեկյանը։
Նշենք, որ 1991 թվականի սեպտեմբերի 2-ին Արցախը հռչակեց իր անկախությունը Խորհրդային Միությունից: Մինչ այդ, 1991-ի դեկտեմբեր 10-ին, Խորհրդային Միության պաշտոնական անկումից ընդամենը մի քանի օր առաջ, Լեռնային Ղարաբաղում անցկացվեց հանրաքվե, որի ընթացքում ազգաբնակչության ճնշող մեծամասնությունը՝ 99,89 տոկոսը, արտահայտվեց Ադրբեջանից լրիվ անկախանալու օգտին: Դրան հետևած ընտրություններում ընտրվեց Լեռնային Ղարաբաղի խորհրդարան, որն էլ կազմեց առաջին կառավարությունը:
2023 թվականի սեպտեմբերի 19-ին Ադրբեջանի կողմից Արցախի ու արցախահայերի դեմ սանձազերված պատերազմի արդյունքում Արցախը հայաթափվեց, քանի որ արցախահայերը կանգնած էին ֆիզիկական բնաջնջման վտանգի առաջ։ Արդեն 2 տարի է՝ հայկական Արցախն ամբողջովին օկուպացված է Ադրբեջանի կողմից։
