Ամենակարևորը ԵԱՏՄ արդյունավետության և գրավչության բարձրացումն է․ Փաշինյանը թվարկեց ՀՀ առաջնահերթությունները ԵԱՏՄ-ում
«Մեր համար առաջնահերթ հարցերից մեկը էներգակիրների ընդհանուր շուկայի ձևավորումն է»,- այսօր Երևանում տեղի ունեցած Եվրասիական միջկառավարական խորհրդի նիստի ամփոփումից հետո տված ճեպազրույցի ընթացքում այս մասին ասաց ՀՀ վարչապետ Նիկոլ Փաշինյանը՝ անդրադառնալով ԵԱՏՄ-ում ՀՀ նախագահության առաջնահերթություններին։
Փաշինյանն ասաց, որ ԵԱՏՄ-ում առաջնահերթ հարցերից մեկը հայկական նախագահության համար բնական գազի, նավթի, էներգակիրների ընդհանուր շուկայի ձևավորումն է և ապագայում ընդհանուր շուկայի ձևավորումն էլեկտրաէներգիայի ոլորտում։
Ըստ նրա, այս հարցի շուրջ քննարկումները շարունակվում են, դա քննարկվում է նաև երկկողմ ձևաչափում։ Փաշինյանը հույս հայտնեց, որ այդ գործընթացը կհասնի իր նպատակին։
Նա հիշեցրեց, որ բազմիցս է ասել, որ ԵԱՏՄ-ի համար կարևոր է այդ շուկայի ձևավորումը, քանի որ գազի և էներգառեսուրսների գներն ազդում են ապրանքների ինքնարժեքի վրա, և այդ նրբությունը կարևոր է ընդհանուր տնտեսական տարածքի համար։
Մյուս առաջնահերթությունը, ըստ ՀՀ վարչապետի, թվային օրակարգն է։
Նրա կարծիքով, ԵԱՏՄ-ում թվայնացումը կմոտեցնի անդամ երկրների տնտեսությունները միմյանց, իրական հնարավորություններ կստեղծի երկրների սուբյեկտների միջև։
«Իմ կարծիքով՝ ամենակարևորը միության արդյունավետության բարձրացումն է անդամ երկրների համար և գրավչության բարձրացումը այլ երկրների համար»,- ասաց Փաշինյանը։
