Ով է Գեղամ Գևորգյանին առաջարկել ՏՄՊՊՀ նախագահի պաշտոնը
Գյուղատնտեսության նախարարի պաշտոնակատար Գեղամ Գևորգյանըն այսօր ԱԺ-ում լրագրողների հետ զրույցում հայտարարեց, որ իրեն Տնտեսական մրցակցության պաշտպանության պետական հանձնաժողովի նախագահի պաշտոնն առաջարկել է վարչապետը, ոչ թե փոխվարչապետ Տիգրան Ավինյանը:
«Չեն անդրադարձել իմ ջերմ կապերը որևէ բանի վրա, իմ մասնագիտական կարողություններ են անդրադարձել»,- վստահեցրեց նա:
Անդրադառնալով իր ապագա աշխատանքին՝ Գ.Գևորգյանը նշեց, որ պատկերացնում է շատ դինամիկ. «Կարծում եմ ՝ ոլորտը բավական հետաքրքիր է և շատ բան կա անելու: Կարծում եմ, որ կկարողանանք ոլորտում հետաքրքիր ձեռքբերումներ ունենալ»:
Ըստ նրա՝ հասարակությունում ճիշտ չի ընկալվում, թե ինչ է մենաշնորհը և ինչ պետք է անի այդ կառույցը.
«Մենաշնորհը կամ գերիշխող դիրքը չպետք է չարաշահվի, բայց հասարակությունում պետք է ճիշտ ընկալվի: Կարող է՝ մենաշնորհը չպետք է վերացվի, բայց չպետք է թողնենք, որ չարաշահվի»:
Գ.Գևորգյանը նշեց, որ Հայաստանում օրենսդրությամբ բոլոր տնտեսվարողների համար հավասար պայմաններ են ապահովված:
