Փաշինյանի վարչակարգը Հայաստանի համար պայթյունավտանգ իրավիճակ է ստեղծել․ Ալիևը կարող է օգտվել առիթից․ Վազգեն Հովհաննիսյան
Քաղաքագետ Վազգեն Հովհաննիսյանն այն կարծիքին է, որ տարածաշրջանային պատերազմը կարող է աղետալի հետևանքներ ունենալ Հայաստանի համար:
«Հայաստանի համար ահավոր կատաստրոֆիկ իրավիճակ է ստեղծվել, որովհետև պարզ է՝ հարվածներ են հասցվում սահմանակից երկրի, որը թշնամաբար չի տրամադրված ՀՀ դեմ, դրա մասին չեմ ուզում խոսել, այլ այն մասին, որ Թուրքիայի և Ադրբեջանի վարքագծային մոդելը պատերազմից հետո ցույց է տալիս, որ նրանք փորձում են օգտվել ստեղծված իրավիճակից։ Նաիվ գնահատականներ կան, որ Ալիևը փորձելու է օգտվել, հարձակվել Իրանի վրա․ նա այդպիսի բան չի անի, որովհետև Իլհամ Ալիևը բավականին ռացիոնալ գործիչ է։
Ինձ թվում է՝ զորաշարժն առաջնահերթ պայմանավորված էր նրանով, որ օգտվեն առիթից, և հնարավոր սցենարների դեպքում ամենաթույլ զոհը Հայաստանի Հանրապետությունն է լինելու»,- 168TV-ի «Ռեվյու» հաղորդման ընթացքում ասաց նա՝ նկատելով, որ Իրանում շատ վատ զարգացումների դեպքում Ալիևը կարող է ռազմակալման ենթարկել հենց այն տարածքը, որը համարում է «Զանգեզուրի միջանցք»։
«Սա հնարավոր սցենար է․ մենք այդ սցենարին պատրաստ չենք, որովհետև Փաշինյանի կողմից ստեղծված մեր Արտաքին հետախուզական ծառայությունն իր վերջին զեկույցում ընտրությունների հետ կապված նորից էլի «հիբրիդային պատերազմ», ինչ-որ մարդիկ ուղղորդում են և այլն․․․
Հասկանո՞ւմ եք՝ ազգային անվտանգության սպառնալիքի այս պարագայում Արտաքին հետախուզական ծառայությունը զեկուցում է բաներ, որոնք տրամաբանությանը հակասող են, ենթադրություններ են՝ առանց փաստերի վրա հիմնվելու, իսկ առաջնային անվտանգության խնդիրն այն է, որ քո պետության գոյությունը կարող է շատ մեծ հարցականի տակ դրվել, որովհետև տարածաշրջանում տեղի է ունենում ռազմական լուրջ բախում, և այն երկրները, որոնք քո անվտանգությանը լուրջ սպառնալիք են՝ Ադրբեջանը և Թուրքիան, զորաշարժ են իրականացնում, որին ոչ մի պատասխան չունենք»,-շեշտեց նա։
Քաղաքագետի խոսքով՝ Արտաքին հետախուզական ծառայության զեկույցից կարելի է ենթադրել, որ Նիկոլ Փաշինյանի վարչակարգին տեղի ունեցող գործընթացներն այդքան էլ հետաքրքիր չեն․ «Օրինակ, եթե Ադրբեջանը ռազմակալման ենթարկի, ո՞վ է խանգարելու»։
Ինչ վերաբերում է իշխանական քարոզչությանը, թե TRIPP-ի իրականացումը երաշխավորելու է ՀՀ գոյությունը, Վազգեն Հովհաննիսյանը նկատեց, որ այն, իրականում, ավելացնելու է մարտահրավերները․
«Ադրբեջանն ստանում է «Զանգեզուրի միջանցք», ով ինչպես ուզում է՝ բացատրի։ Ադրբեջանն ասում է՝ ստացել է «Զանգեզուրի միջանցքը», այսինքն՝ մենք տեսնում ենք ավելի ուժեղ կողմի սկզբունքային մոտեցումն այս հարցի նկատմամբ և դրան համարժեք չենք կարող դիմակայել։
Իսկ այդ նախագծից ուղղակի հրաժարումը՝ առանց հստակ բալանսավորման, ուղղակի ականապատված է, այսինքն՝ մենք արդեն համաձայնություն ենք տվել, որ Ադրբեջանը պետք է ճանապարհ ունենա, հրաժարվում ես՝ Ադրբեջանը կարող է ռազմական ճանապարհով վերցնել։ Այսինքն՝ դուք պատկերացնո՞ւմ եք՝ այս գործող վարչակարգը, որը Նիկոլ Փաշինյանն է գլխավորում, ինչ իրավիճակ է ստեղծել․ պայթյունավտանգ իրավիճակ է ստեղծել։ Հրաժարվում ես՝ քո վրա հարձակման կազուս բելի է ստեղծվում, չես հրաժարվում՝ կամաց-կամաց քեզ աբսորբացիայի են ենթարկում»։
Մանրամասները՝ 168TV-ի տեսանյութում
