Իտալիայի նախկին դեսպանը պատմել է, թե ինչպես է Լավրովը իրեն հրավիրել Ղրիմ
Ռուսաստանում Իտալիայի նախկին դեսպան Ջորջիո Ստարաչեն РИА Новости-ի հետ զրույցում պատմել է, թե ինչպես 2022 թվականի փետրվարին Մոսկվայում կայացած հանդիպման ժամանակ արտգործնախարար Սերգեյ Լավրովը իրեն և այն ժամանակվա նախարար Լուիջի Դի Մայոյին հրավիրել է Ղրիմ, առաջարկ, որը իտալացի դիվանագետները չեն կարողացել ընդունել։
Ստարաչեի խոսքով՝ հանդիպումը տեղի է ունեցել 2022 թվականի փետրվարի 17-ին Ռուսաստանի արտաքին գործերի նախարարության շենքում: Երկու նախարարների բանակցությունները երկար, մանրամասն և ընդհանուր առմամբ ջերմ էին, չնայած Ռուսաստանի և Արևմուտքի միջև Ուկրաինայի շուրջ հարաբերություններում արդեն իսկ նկատելի լարվածությանը: Երբ բանակցությունների հիմնական օրակարգը սպառվել է, Դի Մայոն, ըստ դեսպանի, որոշել է ավարտել հանդիպումը:
«Նա նայեց ինձ և ասաց. «Պարոն դեսպան, կարծում եմ՝ մենք ամեն ինչ քննարկել ենք. ժամանակն է հրաժեշտ տալ նախարար Լավրովին»,- պատմել է Ստարաչեն։
Սակայն Լավրովը կանգնեցրել է իր իտալացի զրուցակիցներին և, ինչպես հիշում է Ստարաչեն, ասել. «Ո՛չ, մենք դեռ չենք ավարտել։ Ես ձեզ ասելիք ունեմ»:
«Սիրելի իտալացի ընկերներին» նախարարը հիշեցրել է Ղրիմում պատմական տարբեր ժամանակաշրջաններում իտալացիների կյանքի մասին՝ սկսած միջնադարում թերակղզու հարավային ափին գտնվող ջենովական և վենետիկյան գաղութներից:
Լավրովն իր գործընկերներին հրավիրել է Ղրիմ: «Դուք ցանկալի հյուր եք Ղրիմում»,- Լավրովի խոսքերն է մեջբերել Ստարաչեն։
Դրանից հետո ռուս նախարարն ավարտել է հանդիպումը։ «Դի Մայոն ինձ ասաց, որ Լավրովը, և դա ակնհայտ է, հսկայական քաղաքական փորձառություն ունեցող մարդ է և, ավելին, հիանալի հումորի զգացում ունի»,- հավելել է դիվանագետը։
Ստարաչեն այս դրվագը բնութագրել է որպես Լավրովի «քաղաքավարի և սարկաստիկ սադրանքներից» մեկը՝ նշելով, որ ռուս նախարարը, իր կարծիքով, հասկացել է նման ուղևորության անհնարինությունը: «Մենք երբեք չէինք կարողանա ընդունել նրա հրավերը»,- հավելել է գործակալության աղբյուրը:
