Ադրբեջանում ՅՈՒՆԻՍԵՖ-ի գրասենյակը սեպտեմբերի 3-ից կդադարեցնի գործունեությունը
Բոլորը ՅՈՒՆԻՍԵՖ-ի (ՄԱԿ-ի մանկական հիմնադրամ ) Ադրբեջանի գրասենյակը կդադարեցնի իր գործունեությունը 2025 թվականի սեպտեմբերի 3-ին։
Այս մասին ադրբեջանական լրատվամիջոցներին հայտնել է ՅՈՒՆԻՍԵՖ-ի Եվրոպայի և Կենտրոնական Ասիայի հաղորդակցության տարածաշրջանային ղեկավար Իրինա Մազուրը։
«ՅՈՒՆԻՍԵՖ-ի գործունեությունը Ադրբեջանում կդադարեցվի 2025 թվականի սեպտեմբերի 3-ին։ ՅՈՒՆԻՍԵՖ-ը կշարունակի համագործակցել Ադրբեջանում իր գործընկերների հետ իր տարածաշրջանային գրասենյակի և շտաբ գրասենյակի միջոցով», – նշել է նա։ Ադրբեջանի ԱԳՆ հաղորդմամբ էլ ՝ երկրի ԱԳ նախարար Ջեյհուն Բայրամովը այսօր ընդունել է ՄԱԿ-ի մանկական հիմնադրամի (ՅՈՒՆԻԴԵՖ) Ադրբեջանում ներկայացուցիչ Սաջա Ֆարուկ Աբդուլլային՝ երկրում նրա դիվանագիտական առաքելության ավարտի կապակցությամբ։ Հանդիպմանը քննարկվել են Ադրբեջանի և ՄԱԿ-ի, այդ թվում՝ ՅՈՒՆԻՍԵՖ-ի միջև համագործակցության արդիական հարցերը, ինչպես նաև քննարկվել են Ադրբեջանում և այլ երկրներում իրականացվող համատեղ նախաձեռնություններն ու նախագծերը։
Սաջա Ֆարուկ Աբդուլլային շնորհակալություն են հայտնել Ադրբեջանում ՅՈՒՆԻՍԵՖ-ի հետ համագործակցությունը զարգացնելու ուղղությամբ իր պաշտոնավարման ընթացքում ներդրած ջանքերի համար և մաղթել հաջողություններ ապագա գործունեության մեջ։ Ջեյհուն Բայրամովը նաև մանրամասնորեն տեղեկացրել է իր զրուցակցին հետհակամարտային շրջանում «օկուպացիայից ազատագրված տարածքներում» (նկատի ունի Արցախի տարածքները ) իրականացված լայնածավալ վերականգնողական և շինարարական աշխատանքների, «խելացի քաղաքի» և «խելացի գյուղի» հայեցակարգերի հիման վրա իրականացված վերակառուցման աշխատանքների մասին, ինչպես նաև մանրամասն խոսել է Ադրբեջանի քաղաքացիների,իբր թե, «իրենց հողեր արժանապատիվ վերադարձն ապահովելու համար կատարված աշխատանքների մասին»։ Հանդիպման ընթացքում մտքերի փոխանակում է տեղի ունեցել նաև փոխադարձ հետաքրքրություն ներկայացնող այլ հարցերի շուրջ։ Հիշեցնենք, որ մարտի 3-ին նախարար Ջեյհուն Բայրամովը ՄԱԿ-ի Եվրոպայի և Կենտրոնական Ասիայի համակարգող գրասենյակի տարածաշրջանային տնօրեն Գվի-Յեոպ Սոնի հետ հանդիպման ժամանակ հայտարարել էր, որ Բաքվի հետագա փոխգործակցությունը ՄԱԿ-ի որոշ կառույցների հետ կշարունակվի նախագծային համագործակցության մեխանիզմի միջոցով՝ ազգային առաջնահերթություններին համապատասխան։
Նաև ընդգծվել է, որ ՄԱԿ-ի որոշ կառույցների հետ ապագա համագործակցությունը կիրականացվի անմիջականորեն նրանց գլխավոր գրասենյակների միջոցով։
